راگه‌یاندنی دەبیرخانەی کۆمیتەی ناوەندی کۆمەڵە به‌ بۆنه‌ی رووداوی دڵته‌زێنی رێگای پاڵنگان

 

ئەمرۆ پینج شەممە رێکەوتی ١١ی خەرمانان مینی بووسێك لە رێگای کامیاران بۆ پاڵنگان لە شوێنێک بە ناوی “تفێن” وەرگەرا و بە داخەوە لەم کارەساتە دڵتەزێنەدا تا ئیستا ١٦ کەس گیانیان لە دەس داوە و ١٢ کەسیش بریندار بوون كه‌ زۆربه‌یان دانیشتوی ئاوایی پیر سه‌فان. دیارە ئەمە یه‌كه‌م جار نیە کە رێگا و بانەکانەکانی کوردستان وەک زور شوێنی تری ئێران ده‌بنه‌ قەتڵگای خەڵک ، هەر لە دوو مانگی یه‌كه‌می ئه‌مساڵدا، زیاتر لە ٢٦٠٠ کەس لە رێگاوبانەکانی ئێراندا گیانیان لە دەس داوە و زیاتر لە ٤٧ هەزار کەسیش بریندار بوون. ئەم ژمارە بەرچاوە لە قوربانی ئەویش تەنیا لە رێگا وبانەکاندا چارە هەڵنگر نییە . لە زور شوێنی دونیا بە ستانداردکردنی رێگا وبانەکان و کەرەسەی هاتوچوو و بڕدنە سەرەوی زانستی هاتوچوو کردن، رووداوەکانی رێگاوبان بە رادەیه‌کی بەرچاو کەم دەکڕێنەوە، بەڵام لە ئیرانی ژیر دەسەڵاتی کۆماری ئیسلامی کە گیان و مافی ئینسانەکان بایخی نییە، بێ گومان دابینکردنی هەزینەی پێویست بۆ کەمکردنەوەی قوربانی دان لە رێگا و بانەکاندا بە تایبەت لە کوردستان لە ئەولەویه‌تی ئەم دەسەلاتەدا نییە. هەر بویە تاوانباری سەرەکی لەم چەشنە رووداوانە کۆماری ئیسلامییه‌ کە به‌رانبه‌ر به‌ گیان و ژیانی هاووڵاتیان خۆی به‌ به‌رپرس نازانێ. ویستی عادڵانه‌ی خه‌ڵك ئه‌وه‌یه‌ كه‌ زیانه‌كانی ئه‌م رووداوه‌ به‌ زووترین كات قه‌ره‌بوو بكرێنه‌وه‌ و به‌ تایبه‌ت ژیانی ئه‌و بنه‌ماڵانه‌ی كه‌ نان ئاوریان له‌ ده‌ست داوه‌ به‌ ته‌واوی دابین بكرێت. پێویسته‌ به‌ خێرایی هەموو ئیمکاناتی پزشکی بۆ دەرمانکردنی بریندارەکانی ئەم رووداوە بە کار بێت.

ئێمە وێڕای دەربرینی نیگەرانی خۆمان لە ئاست ئەم وەزعە نالەباره‌ی‌ رێگا و بانه‌كانی كوردستان، له‌ بنەمالە و کەس و کاری گیان بەختکردووانی ئەم رووداوە سەرەخوشی ده‌كه‌ین و خۆمان به‌ شه‌ریكی خه‌میان ده‌زانین. هیوادارین بریندارەکان هەرچی زووتر سەڵامەتی خۆیان بە دەس بێننەوە .

 

دەبیرخانەی کومیتەی ناوەندی کۆمەڵە(رێكخراوی كوردستانی حیزبی كومونیستی ئێران)

 

ریکەوتی ١١ خەرمانانی  ١٤٠٠هەتاوی

مطالب مرتبط