ئاشكرابوونی ناسناوی دوو به‌ندكراوی بریندار له‌ زیندانی قزلحه‌سار

ڕۆژی یه‌كشه‌ممه‌ ٨ی ڕێبه‌ندان، گاردی سه‌ركوتی زیندانی قزلحه‌ساری كه‌ره‌ج هێرشی كرده‌ سه‌ر به‌ندكراوانی به‌ندی چوار و پێنج به‌ندكراوی بریندار كرد.

به‌پێی ڕاپۆرته‌كان، هێزه‌كانی ڕژیم وێڕای شكاندنی كه‌ره‌سته‌ی به‌ندكراوان، ده‌ستیان به‌سه‌ر كه‌لووپه‌له‌ شه‌خسیه‌كانیاندا گرتووه‌. كاتێك به‌ندكراوان دژبه‌ ڕژیم دروشمیان به‌رز كردۆته‌وه‌، سه‌ركوتگه‌ران به‌ باتۆم و گازی فرمێسكڕیژ هێرشیان كردۆته‌ سه‌ریان و پێنج كه‌سیان بریندار كردووه‌. دوو كه‌س له‌ برینداره‌كان به‌ ناوه‌كانی “سامان یاسین” و “ئه‌فشین بایمانی” به‌هۆی تێكچوونی باری ته‌ندرووستی ڕه‌وانه‌ی نه‌خۆشخانه كراون.