ڕۆژی چوارشه‌ممه ٥ی پووشپه‌ڕ، كۆمه‌ڵێك له كرێكارای شاغڵ له سه‌نعه‌تی نه‌وت، گاز و پترۆشیمی باشووری ئێران له به‌یاننامه‌یه‌كدا شانۆی هه‌ڵبژاردنی سه‌رۆككۆمارییان بایكۆت كرد.
له به‌شێكی ئه‌و به‌یاننامه‌یه‌دا هاتووه، به‌ربژێره‌كانی شانۆی هه‌ڵبژاردن له ماوه‌ی چه‌ند مانگی ڕابردوودا مانگرتنی كرێكارانی په‌یمانی و پڕۆژه‌یی، كۆبوونه‌وه‌ی موعه‌لمیان، په‌ره‌ستاران، خانه‌نشینكراوان و چین و توێژه‌كانی كۆمه‌ڵگایان بینیوه به‌ڵام هیچ هه‌ڵوێستێكیان نه‌بووه و له به‌رانبه‌ر ئه‌و هه‌موو سیته‌مه بێده‌نگیان ڕاگرتووه. ئه‌زموونی چوار ده‌یه‌ی ڕابردوو نیشانی داوه كه گرانی و هه‌ڵاوسان زیاتر بووه، هه‌ژاری په‌ره‌ی سه‌ندووه و سیسته‌می سه‌ركوت توندتر بووه‌ته‌وه، هه‌ر به‌و بۆنه‌وه كرێكارانی نه‌وت، گاز و پترۆشیمی له‌گه‌ڵ په‌ره‌ستاران، موعه‌لیمان، خانه‌نشینكراوان و بنه‌ماڵه دادخوازه‌كانی ئێران هاوده‌نگ له شانۆی هه‌ڵبژاردنی سه‌رۆككۆماری دا به‌شداری ناكه‌ن.
