ئه‌نجومه‌نی دادخوازانی كوردستان، یه‌كێتی ژنانی كوردستان، ژنانی كوردستان دژ به هه‌ڵاواردن و چالاكانی مافی ژن له به‌یاننامه‌یه‌كدا سه‌پاندنی سزای سێداره‌یان به‌سه‌ر په‌خشان عه‌زیزی و وریشه مورادی به توندی شه‌رمه‌زار كرد.
خه‌ڵكی شۆڕشگێڕی كوردستان، باش ده‌زانن كه كۆماری ئیسلامی له‌گه‌ڵ ده‌یان قه‌یرانی نێوخۆیی و ده‌ره‌كی به‌ره‌وڕوو بووه‌ته‌وه، به‌و بۆنه‌وه ڕێژه‌ی ئێعدامه‌كانی بردووه‌ته سه‌ره‌وه. په‌خشان عه‌زیزی ئینسانێكی شه‌ریف و یاریده‌ری ئاواره‌كانی شه‌ڕی داعش له ڕۆژئاوای كوردستان و شه‌نگال بووه، ئێستا كه ڕژیمی سه‌ركوتگه‌ر ڕووبه‌ڕووی قه‌یرانی كه‌می سووته‌مه‌نی، به‌رق و گاز بووه، ده‌یه‌وێت له ڕێگه‌ی ئێعدامكردنی ئازادیخوازانه‌وه ناكارامه‌یی خۆی داپۆشێنێت. كۆماری ئیسلامی تووشی داڕمان بووه و بۆ هه‌ڵوه‌شانه‌وه‌ی سزای سێداره‌ی په‌خشان عه‌زیزی و وریشه مورادی، ئه‌بێ یه‌كڕێزی و یه‌كگرتوویی خۆمان پته‌وتر بكه‌ین، ئه‌وه‌ش ناكرێت مه‌گه‌ر له سه‌ر شه‌قام.
