بەپێی ڕاپۆرتەکان، سەرلەبەیانی ڕۆژی دووشەممە ١٧ی خاکەلێوەوە شەپۆلێک هێرشی ئاسمانی بەربڵاو لە سەرتاسەری وڵات دەستی پێکردووە و دەیان شار بوونەتە ئامانجی تەقینەوە، بۆمباران و هێرشە مووشەکییەکان. چڕی و فراوانیی ئەم هێرشانە بە شێوەیەک بووە کە زۆربەی ناوچەکان هاوکات لەژێر ئاگردا بوون.
لە تاران لە نزیکەی کاتژمێر ٢:٣٠ی خولەکی سەر لە بەیانی، زۆرێک لە ناوچەکانی وەک لەویزان (دەوروبەری زانکۆی مالک ئەشتەر)، نیزامئاباد، نارمک، تێهرانپارس، سەبلان، مەرزداران، سەلسەبیل، مەحموداوا، پاسداران و دەوروبەری فڕۆکەخانەی مێهرآباد بوونەتە ئامانجی تەقینەوەی توند. بە گوێرەی ڕاپۆرتەکان چوار تەقینەوەی بەهێز لە ناوچەی سەلسەبیل، تەقینەوەی بەردەوام لە سایتەکانی پارچین و بیدگنە و هەروەها لە ڕۆژئاوا و ڕۆژهەڵاتی تاران ڕوویداوە. هەروەها وێنە و ویدیۆکان نیشان دەدەن کە دووکەڵێکی قورس لە دەوروبەری مەیدانی ئازادی و باکووری فڕۆکەخانەی مێهرآباد بەرز بووەتەوە. لە زانکۆی پیشەسازیی شەریفیش تەقینەوە ڕوویداوە و سەرچاوە ناوخۆییەکان هۆکارەکەیان گەڕاندووەتەوە بۆ تەقینەوەی هێڵی گاز. لە پارێزگای ئەلبورز، ناوچەی فەردیس لە کرج شاهیدی تەقینەوەی بەردەوام بووە و هەروەها هێرش کراوەتە سەر بەهارستانی تاران (شاری قەلعەمیر) کە بەهۆیەوە تا ئێستا لانیکەم ١٣ کەس کوژراون. هەروەها ڕاپۆرتەکان لە بەهارستان و قوم باس لە تیرۆری ئامانجدار دەکەن. لە شارەکانی تر، لەوانە قوم، شیراز، تەورێز، خۆڕەمئاباد و کرماشان تەقینەوە ڕوویداوە. لە بۆشەهریش هێرش کراوەتە سەر وێزگەی کارەبا و دەنگی تەقینەوەکان تا مەودای چەندین کیلۆمیتر هەست پێکراوە. لە باشووری وڵات، بەندەرعەباس، بەنـدەری لەنگە، بەنـدەری کەنگان، حاجیآباد و ئابدانان بوونەتە ئامانجی هێرشەکان. بە پێی هەواڵەکان لە بەنـدەری لەنگە، پۆمپی بەنزین و هۆتێلێک کراوەتە ئامانج و قوربانیی زۆری لێکەوتووە. لە ئەهۆازیش جگە لە تەقینەوەی بەردەوام، بنکەکانی هێزەکانی ئاسایش و ناوەندە پەیوەندیدارەکان کراونەتە ئامانج. ڕاپۆرتەکان هەروەها ئاماژە دەکەن بە هێرش بۆسەر شارەکانی تری وەک ئەردەبیل، زەنجان، میانه، مهاباد، ئیلام، بروجێرد، شووشتەر، ئیزە، سیرجان، ئێرانشەهر، جیرفت، ڕەفسەنجان و ساوە. لە گیلانیش باس لە بۆمبارانی توند کراوە. بەپێی سەرچاوەکان، ئەم هێرشانە وەک کەمپەینێکی هاوتەریب و فراوان لەلایەن ویلایەتە یەکگرتووەکانی ئەمریکا و سپای ئیسرائیلەوە ئەنجام دەدرێن و بە بەراورد بە ڕۆژانی پێشوو زۆر چڕ و بەربڵاوتر بوون. هەروەها باس لە بە ئامانجکردنی ستادی فەرماندەیی سپا لە کولاهدوز و هێرش بۆسەر ناوەندە سەربازی و ئەمنییەکان دەکرێت. شایانی باسه تا کاتی داڕشتنی ئەم هەواڵە، دەنگی تەقینەوە لە زۆربەی ناوچەکان بەردەوامە.
