تۆڵه‌سه‌ندنه‌وه‌ له‌ خه‌ڵك پاش شكستی ڕژیم له‌ به‌رانبه‌ر هێرشه‌كانی ئیسڕائیل

دوابەدوای شکستەكانی کۆماری ئیسلامی لە بەرانبەر هێرشەکانی ئەم دواییەی ئیسرائیل بۆ سەر ژێرخانە سەربازی و ئه‌تۆمییه‌كانی ڕژیم، ده‌زگای گه‌نده‌ڵی قه‌زایی هه‌ڕه‌شه‌ی تۆڵه‌سه‌ندنه‌وه‌ی له‌ خه‌ڵك كردووه‌.

ڕاپۆرتەکان ئاماژە بەوە دەکەن کە دوای ئەم شکستانە شەپۆلێکی بەپەلەی گرتن و لەسێدارەدان بە تۆمەتی ساختەی “سیخوڕیکردن بۆ ئیسرائیل” دەستیپێکردووە. ئەم ڕێوشوێنانە تەنیا هەوڵێک نین بۆ پەردەپۆشکردنی لاوازییە ئیتلاعاتیی و سەربازییەکانی ڕژیم، بەڵکوو ئامرازێکن بۆ ترساندن و سەرکوتکردنی ئەو خەڵکانەی کە ساڵانێکە لە ژێر گوشاره‌ ئابووری، سیاسی و كۆمه‌ڵایه‌تی ئازار ده‌چێژن. لێدوانەکانی ئەم دواییەی ئاخووندەكانی حکومەت کە بە ئاشکرا باسیان لە “دادگاییكردنی سه‌حرایی” و لەسێدارەدانی خێرا بەبێ بەڵگەنامە کردووە، سرووشتی ئەم سەرکوته‌ خوێناوییە ئاشکرا دەکات.