بەپێی دوایین زانیارییەکان، هێزەکانی ڕژیمی کۆماری ئیسلامی لە ڕۆژانی ڕابردوودا لە هەندێک ناوچەی پارێزگای کوردستان بۆ جێگیرکردنی هێز و کەرەستە سەربازییەکان، کەڵکیان لە ناوەندە گشتییەکان وەرگرتووە.
بەپێی هەواڵی گەیشتوو لە شاری مەهاباد، هێزە سەربازییەکان هۆڵی وەرزشی “جەلیلی خەسرەوشاهی” کە لە تەنیشت قوتابخانەی “زانیار” هەڵکەوتووە، کردوویانەتە شوێنی جێگیرکردنی هێزەکانیان و ژمارەیەکی بەرچاو لە سەربازان لەو شوێنەدا بینراون. هەروەها لە شاری سەردەشت، ڕاپۆرتەکان باس لەوە دەکەن کە هێزەکانی سپای پاسداران لە هەندێک قوتابخانە، مزگەوت و ناوەندی فێرکاری جێگیر بوون و هەروەها لە هەندێک شوێنی شاردا هێزە ئەمنیەکان بەشێوەیەکی جیاواز بە ئۆتۆمبێلی مەدەنی هاتوچۆ دەکەن. جێگای ئاماژەیە، بەکارهێنانی ناوەندە گشتییەکان و خزمەتگوزارییەکان بە مەبەستی سەربازی، لە ماوەی ئەم شەڕەدا نیگەرانیی بەرچاوی لەنێوان دانیشتوانی ناوچەکە دروست کردووە.
