ڕۆژی دووشه‌ممه ٢٤ی به‌فرانبار، مه‌راسمی حه‌ڤده‌هه‌مین ساڵڕۆژی گیانبه‌ختكردنی ئیبراهیم لوتفۆڵڵاهی به ئاماده‌بوونی دادخوازان و بنه‌ماڵه‌ی زیندانیانی سیاسی له شاری سنه به‌ڕێوه چوو.
ئیبراهیم لوتفوڵڵاهی، خوێندکاری به‌شی یاسا، مانگی بەفرانباری ساڵی ٨٦ی هه‌تاوی، لەلایەن ئیداره‌ی ئیتلاعاته‌وه ده‌ستبه‌سه‌ر و ڕۆژی ٢٥ی بەفرانباری هەمان ساڵ لە ژێر ئەشکەنجەی دڕندانەی مه‌ئموورانی وه‌زاره‌تی ئیتلاعات دا گیانی لەدەست دا. تەرمی ئه‌و به‌ندكراوه سیاسییه له‌لایه‌ن ناوه‌نده ئه‌منیه‌تیه‌كانه‌وه بە نهێنی نێژرا و سه‌ركوتگه‌ران بۆ ئه‌وه‌ی تاوانه‌كه‌یان بشارنه‌وه، گۆڕەکەیان بە چیمەنتۆ داپۆشان. ڕۆژی ڕابردوو حه‌ڤده‌هه‌مین ساڵڕۆژی گیانبه‌ختكردنی ئیبراهیم لوتفۆڵڵاهی بوو، به‌و بۆنه‌وه دادخوازانی شاری سنه و بنه‌ماڵه‌ی به‌ندكراوانی سیاسی له‌سه‌ر مه‌زاری ئه‌و هه‌میشه زیندووه كۆبوونه‌وه و له به‌یاننامه‌یه‌كدا وێڕای ئیدانه‌كردنی سزای سێداره، خوازیاری هه‌ڵوه‌شانه‌وه‌ی حوكمی ئێعدامی په‌خشان عه‌زیزی و وریشه مورادی بوون.
