بەگوێرەی ڕاپۆرتەکان، هێرشە هاوبەشەکانی ئەمریکا و ئیسرائیل بۆ سەر ناوەند و پێگە سەربازییەکانی کۆماری ئیسلامی لە چەند شاری ئێران هێشتا بەردەوامە و زیانێکی بەرچاو بە ژێرخانەکانی ڕژیم گەیشتووە.
بەپێی زانیارییەکان، لە تاران دانیشتوان باس لە بیستنی دەنگی فڕینی فڕۆکە جەنگییەکان و تەقینەوەی بەهێز لە بەشێک لە ڕۆژهەڵاتی پایتەخت دەکەن و ناوچەیەک لە ئەفسەریە تا پیروزی بەر بۆمباران کەوتووە. هەروەها باس لەوە دەکرێت کە چەند ناوەندێکی سەربازی و پەیوەندیدار بە هێزەکانی سیستەمی بەرگری هەوایی و فەرماندەیی لە ڕۆژهەڵاتی تاران کرانە ئامانج، لەوانە ناوەندەکانی لۆجستیک لە قەسری فیرووزە، تیپی ئەمیرولموئمنین و پادگانی کولاهدووز و دۆشانتەپە. لە هەمان کاتدا بەپێی هەواڵەکان، ناوەندە پەیوەندیدارەکان بە سپای پاسداران لە شاری تەورێز و هەروەها بنکەی هێزی ئینتزامی مارالان بەر هێرش کەوتوون. هەروەها بەپێی ڕاپۆرتەکان لە ئیسفەهان کۆگای مووشەکەکانی «قادر» کرایە ئامانج و لە کرماشانیش مەیدانی نەوت و بنکەی سپای «نەبی ئەکرەم» بۆمباران کراوە.
