به‌پێی ڕاپۆرتی كانوونی مافی مرۆڤی كوردستان، دۆخی ته‌ندرووستی “كه‌یوان ڕه‌شۆزاده” به‌ندكراوی سیاسی مانگرتوو له زیندانی ورمێ ناجێگیره و پاش گواستنه‌وه‌ی بۆ به‌ندی تاكه‌كه‌سی، له‌لایه‌ن مه‌ئموورانی ڕژیمه‌وه ئه‌شكه‌نجه و ئازار دراوه.
“نازدار ڕوودساز”، دایکی “کەیوان ڕەشوزادە”، کە پێنجەمین ساڵی به‌ندكرانی لە زیندانی ورمێ دا تێپه‌ڕ ده‌كات، لە پەیامێکی ڤیدیۆییدا وتی: من دایکی “کەیوان ڕەشوزادە”م كه بە ٧ ساڵ و ٦ مانگ زیندان سزا دراوە، ٥ ساڵی حوکمەکەی تێپەڕاندووە، بەڵام کەس گرنگی بە بارودۆخی نادات، دەچمە لای دادوەر هیچ گرینگی پێ نادات، دەچمە ئیدارەی ئیتلاعات دەڵێن ئێمە هیچ زانیارییەکمان نییە و دەستێوەردان لەم بابەتەدا ناکەین، سەرۆکی زیندان و دادوەر ئاگاداری دۆخی ئەون. بەرپرسانی زیندان لێیان داوە، پاسەوانانی زیندان هاتوون، دەست و قاچیان بەستووە و لێیان داوە، مل و سەر و دەستیان شکاندووە. لەو كاتەوە ئاو و خواردنی نەخواردووە، باوکی کەیوان نەخۆشە، دایکی ئەم منداڵەش نەخۆشە، بێ سەرپەرشت ماینه‌ته‌وه، ئێمە بێتاوانین، کەس بە دەردی ئێمە نازانێت، نازانین چی بكەین.”
