ڕۆژی سێشه‌ممه ١٢ی خاكه‌لێوه‌ی ١٤٠٤، به‌ندكراوانی ٣٨ زیندانی ئێران بۆ شه‌ست و دووهه‌مین حه‌فته‌ی به‌رده‌وام دژ به سزای سێداره مانیان له خواردن گرت.
به‌ندكراوانی مانگرتوو له به‌یاننامه‌یه‌ك دا ڕایانگه‌یاند: كۆماری ئیسلامی له ڕۆژانی پشوودانی نه‌ورۆزیش دا ماشینی ئێعدامی ڕانه‌گرتووه و له‌و ماوه‌یه‌دا سزای سێداره‌ی به‌شێك له به‌ندكراوانی سیاسی وه‌كوو حه‌مید حسێن نژاد حه‌یده‌رانلوو له دیوانی باڵای وڵات پشتڕاست كراوه‌ته‌وه. هه‌روه‌ها په‌روه‌نده‌ی وریشه مورادی ڕه‌وانه‌ی دیوانی باڵای وڵات كراوه و سه‌باره‌ت به ده‌ركردنی دووباره‌ی سزای سێداره به سه‌ر ئه‌و به‌ندكراوه سیاسییه هۆشدار به ده‌زگای قه‌زایی ڕژیم ده‌ده‌ین. مانگرتووان له كۆتایی به‌یاننامه‌كه‌یان دا داوایان له خه‌ڵكی ئێران كرد: بۆ ڕاگرتنی سزای سێداره له‌به‌رده‌م به‌ندیخانه‌كانی ڕژیم دا مان بگرن و ڕێگه نه‌ده‌ن ڕۆڵه‌كانی نیشتمان به ئاسانی ئێعدام بكرێن.
