ڕۆژی پێنجشه‌ممه ٧ی ڕه‌شه‌ممه‌ی ١٤٠٣، جووتیارانی ئیسفه‌هان دژ به وه‌دینه‌هاتنی داخوازییه‌كانیان و خراپی دۆخی ژیانیان كۆبوونه‌وه و ناڕه‌زایه‌تییان ده‌ربڕی.
كه‌شاوه‌رزان له كۆبوونه‌وه‌كه‌دا دژ به بڕینی حه‌ق ئاوه‌كانیان ناڕه‌زایه‌تییان ده‌ربڕی و ئاماژه‌یان به‌وه كرد كه به هۆی بڕینی ئاوی زایه‌نده ڕوود، زیانێكی زۆریان به‌ركه‌وتووه و خوازیاری بایه‌خ دانی ڕژیمی كۆماری ئیسلامی به دۆخی ژیانی جووتیاران، پێدانی حه‌ق ئاوه، وه‌دیهاتنی داخوازییه‌كانیان و گۆڕینی به‌رپرسه گه‌نده‌ڵه‌كانی به‌رپرسیار له‌م كێشه‌ی جووتیارانه‌دا بوون. جێگای ئاماژه‌یه، له ساڵانی ڕابردوودا جووتیارانی ئیسفه‌هان دژ به بڕینی حه‌ق ئاوه و هه‌روه‌ها خراپی دۆخی كشت و كاڵ له ئیسفه‌هان، سه‌دان كۆبوونه‌وه‌یان به‌ڕێوه‌بردووه، به‌ڵام هه‌موو كات ڕووبه‌ڕووی به‌ڵێنه درۆیینه‌كانی به‌رپرسانی ئه‌و به‌شه له پارێزگای ئیسفه‌هان بوونه‌ته‌وه و تائێستا كێشه‌كانیان چاره‌سه‌ر نه‌بووه.
