به‌هۆی شه‌ڕ و پێكدادانی نێوان عه‌له‌وییه‌كانی سووریه و چه‌كدارانی ته‌حریر شام له شاره‌كانی لازقییه، بانیاس، حۆمس و حه‌ما زیاتر له هه‌زار كه‌س كوژراون و به سه‌دان كه‌س بریندار بوون.
به‌پێی ئه‌و ویدیۆیانه‌ی له تۆڕه كۆمه‌ڵایه‌تیه‌كان بڵاو كراوه‌ته‌وه، ته‌رمی خه‌ڵكی مه‌ده‌نی له‌سه‌ر شه‌قامه‌كانی سووریه دا كه‌وتووه و چه‌كدارانی ته‌حریر شام هه‌ڵسووكه‌وتی وه‌حشیانه و ناشیاو له‌گه‌ڵیان دا ئه‌نجام ده‌ده‌ن. به وته‌ی سه‌رۆكی ڕێكخراوی ڕوانگه‌ی سووری بۆ مافه‌كانی مرۆڤ، زیاتر له هه‌زار كه‌س له ناوچه عه‌له‌وینشینه‌كان كوژراون كه ٧٤٥ كه‌سیان خه‌ڵكه‌ی مه‌ده‌نیین و ١٢٥ كه‌س هێزه ئه‌منیه‌كانی وه‌فادار به به‌شار ئه‌سه‌د بوون. هه‌روه‌ها ده‌یان چه‌كداری ئیسلامگه‌راش له پێكدادانه‌كانی هه‌ر دوولا كوژراون و بڵاوبوونه‌وه‌ی وێنه‌كان، كاردانه‌وه‌ی كۆمه‌ڵگای جیهانی به‌دوای خۆی دا هێناوه. شایانی باسه كه یه‌كێتی ئورووپا و نه‌ته‌وه‌یه‌كگرتووه‌كان داوایان له حكوومه‌تی نوێی سووریه كردووه تاوانباران ده‌ستبه‌سه‌ر و زیندانی بكات.
