به داخێکی گرانەوه ئاگادار بووین کە ڕۆژی پێنجشه‌ممه ١٦ی خاكه‌لێوه، ھاوڕێ “عه‌لی زه‌ندی” هونه‌رمه‌ندی شۆڕشگێڕی خه‌ڵكی سنه و پێشمەرگەی دێرینی کۆمەڵە ، به‌هۆی نه‌خۆشی له وڵاتی كانادا ماڵئاوایی له ژیان كرد.
کاک “عه‌لی زه‌ندی” هونه‌رمه‌ندێكی شۆڕشگێڕ بوو کە ماوەیەک چەکی پێشمەرگایەتی کۆمەڵەی لە شان کرد . پاش وازھێنانیشی لە پێشمەرگایەتێ وەک ھونەرمەندێکی دڵسۆز،دەنگ خۆش و دژ بە کۆماری ێیسلامی درێژەی بە چالاکی ھونەری دا و لە زۆر بۆنەوە و ڕێوڕەسمەکانی کۆمەڵە بەشداریکردوە و بە دەنگە بە سۆزوبە تینەکەی ئومێدی دواڕۆژێکی گەشی بە بەشدارانی ئەو کۆڕوکۆبوونەوانە و جەماوەری خەڵک دەدا .
کاک عەلی خزمه‌تێكی زۆری كرد به هونه‌ری شۆڕشگێر لە کوردستان و خۆشه‌ویستی جەماوەرێکی بەرین ، بە تایبەت لە شاری سنە و مەڵبەندی جنوبی کوردستان بوو. کاک “عه‌لی زه‌ندی” تووشی نەخۆشی شێرپەنجە ھات و پاش ماوه‌یه‌ك به‌سته‌ری بوون له نه‌خۆشخانه‌یه‌كی شاری تۆرنتۆ له وڵاتی كانادا ، ڕۆژی ڕابردوو بۆ هه‌میشه چاوی ھیوابەخشی بە ژیان لە سەر یەک دانا و ماڵئاوایی له ژیان و ھاوڕێیان و ئازیزانی كرد. وێڕای دەربڕینی داخی قووڵمان لەم کۆچە ناوادە ، پڕ بە دڵ سەرەخۆشی لە بنەماڵە،کەس و کار و خۆشەویستانی دەکەین . یادی ئازیزی بۆ ھەمیشە به‌رز و به‌ڕێز بێت.
