به‌دوای قه‌یرانی دارایی و دۆخی خراپی مه‌عیشه‌تی له هه‌رێمی كوردستان، خوێندكاران له زانكۆكانی (حه‌ڵه‌بجه، چه‌رموو و ڕاپه‌ڕین) ده‌ستیان داوه‌ته مانگرتن و هۆڵه‌كانی خوێندنیان داخست.
شۆرای سنفی خوێندكارانی زانكۆی حه‌ڵه‌بجه له به‌یاننامه‌یه‌كدا ڕایگه‌یاند كه به هۆی دۆخی خراپی مه‌عیشه‌تی، زۆربه‌ی خوێندكاران بڕیاریان دا كه له ڕۆژی ١ی مانگی ئاوریله‌وه هۆڵه‌كانی خوێندن دابخه‌ن و ئه‌گه‌ر داخوازییه‌كانیان جێبه‌جێ نه‌كرێت، ئه‌وه تا كۆتایی مانگی ڕه‌مه‌زان درێژه به مانگرتن ئه‌ده‌ن. به‌وته‌ی خوێندكاران، له ساڵی ٢٠٢٤ دا هێشتا ده‌رماڵه‌یان وه‌ر نه‌گرتووه و له دۆخێكی خراپدا ژیان به‌سه‌ر ئه‌به‌ن. خوێندكارێك له‌و باره‌وه وتی: له زانكۆی پارێزگاكانی هه‌وڵێر و دهۆك دوو جار ده‌رماڵه‌یان به خوێندكاران داوه به‌ڵام له سنووری پارێزگای سلێمانی هێشتا هیچ پاره‌یه‌كی كۆمه‌ك مه‌عیشه‌تی به خوێندكاران نه‌دراوه.
