بنه‌ماڵه‌ی قوربانیانی فڕۆكه‌ی ئۆكراینی، ڕۆژی سێشه‌ممه ١٨ی به‌فرانبار، هاوكات له‌گه‌ڵ پێنجه‌مین ساڵڕۆژی پێكرانی ئه‌و فڕۆكه به مووشه‌كه‌كانی سپای پاسداران، له شوێنی ڕووداوه‌كه كۆبوونه‌وه و ڕێزیان له یادی گیانبه‌ختكردووانی ئه‌و جه‌نایه‌ته گرت.
مه‌راسیمه‌كه به ڕاگرتنی یه‌ك خوله‌ك بێده‌نگی بۆ ڕێزلێنان له یادی گیانبه‌ختكردووان ده‌ستی پێ كرد و بنه‌ماڵه‌ی قوربانیان به دانانی كه‌لووپه‌لی به‌جێماو له گیانبه‌ختكردووان و دانانی وێنه‌كانیان، یادی ئازێزانیان به‌رز ڕاگرت. مه‌حموود عه‌لیزاده‌ی ته‌باته‌بایی، پارێزه‌ری ژماره‌یه‌ك له بنه‌ماڵه‌ی قوربانیان له وتارێك دا ڕایگه‌یاند: وێڕای تێپه‌ڕبوونی شه‌ش مانگ به‌سه‌ر گه‌ڕانه‌وه‌ی په‌روه‌نده‌ی ئه‌و ڕووداوه بۆ دادگای نیزامی، ڕژیمی سه‌ركوتگه‌ر هێشتا به‌دواداچوونی بۆ نه‌كردووه. بنه‌ماڵه‌ی گیانبه‌ختكردووان به وتنه‌وه‌ی دروشم یه‌كڕێزی و یه‌كگرتوویی خۆیان دووپات كرده‌وه و خوازیاری محاكمه و سزادانی تاوانباران بوون.
