ڕۆژی سێشه‌ممه ١٥ی ڕه‌شه‌مه، مه‌راسمی ناشتنی ته‌رمی هونه‌رمه‌ندی گه‌وره‌ی ناوچه‌ی هه‌ورامان، كاك “جه‌میل ئه‌حمه‌دی” به به‌شداری به‌رینی خه‌ڵك له شارستانی نه‌سوود به‌ڕێوه چوو.
“جەمیل ئەحمەدی” ناسراو بە “جەمیل هه‌ورامی” یان “جەمیل نەوسوودی”، گۆرانیبێژی بەناوبانگی هه‌ورامان و وەستای وتنی سیاچەمانە بوو. ناوبراو ساڵی 1946ی زاینی لە گوندی لهۆنی سەر بە ناوچەی هەورامان لە دایک بوو. مامۆستا جەمیل ساڵی 1966 دەستی بە کاری هونەری لە بواری مۆسیقای فۆلکلۆری هەورامان کرد، ساڵی 1970 یەکەم کاسێتی خۆی لەگەڵ مامۆستا “عوسمان هەورامی” تۆمار کرد و لەگەڵ مامۆستایانی گەورەی دەیکە ناوچەی هەورامان وەک “حەمە حسێن کێمنەیی” و “سەباح هەورامی” دەستی بە چالاكی هونه‌ری کرد. بە داخەوە مامۆستا جەمیل نەوسوودی شەوی دووشه‌ممه 13ی ڕەشەمەی ١٤٠٢ی هه‌تاوی، کۆچی دوایی کرد و بۆ هەمیشە یادی لە دڵی کوردەواری بەجێهێشت. جێگای ئاماژه‌یه که کاک جه‌میل برای هاورێی گیانبه‌ختکردوی ناو ریزه‌کانی کۆمه‌ڵه هاورێ “مه‌حموود ئه‌حمه‌دی” ناسراو به “مه‌حموود هه‌ورامی” له گوردانی شاهۆ بوو.
