هەموو هێلکەکانتان مەخەنە ناو یەک سەبەتەوە
✍️:حەمید ڕەحمانپوور
هاوپەیمانیی ٦ حیزبە کوردستانییەکە و نەچوونی کۆمەڵە ڕێکخراوی کوردستانی حیزبی کۆمۆنیستی ئێران بۆ ناو ئەو هاوپەیمانییە
هاوڕێیانی ئازیز، بەتایبەت لە کوردستان،
لەم ڕۆژانەی دواییدا باس و خواسێکی زۆر لەنێوان لایەنگرانی هاوپەیمانیی ٦ حیزبە کوردستانییەکە و کۆمەڵە (ڕێکخراوی کوردستانی حیزبی کۆمۆنیستی ئێران) کە نەچووەتە ناو هاوپەیمانییەکەوە، هاتۆتە ئاراوە. کۆمەڵە هۆکارەکانی بەوردی بۆ ڕای گشتی بڵاو کردۆتەوە.
بڕوای من وایە کە هاوپەیمانیی ٦ حیزب و نەچوونی حیزبێکی دیکە، کارێکی تەواو لۆژیکی و سروشتییە. دەبێ ئەوەندە دیموکرات و واقیعبین بین کە کەسانی دیکە و ئەوانەی لە دەرەوەی ئەم ڕەوتە حیزبییانەن، ئەمە قبووڵ بکەن و بە دیدێکی کراوە و بە ڕێزگرتن لە ڕا و ئاڕاستەی حیزبەکان بڕوانن. هەموویان هۆکاری خۆیان هەیە و بێگومان سروشتییە کە هەوڵ بدەن شەپۆلێکی بەرفراوانتر لە ڕاستیی هەڵوێستەکانی خۆیان قەناعەت پێبکەن.
کۆمەڵانی خەڵکی کوردستان، سەرەڕای هەبوونی توێژ و چین و ڕەوتە سیاسییە جیاوازەکان و بە سەرنجدان بە مێژوویەکی پڕ لە ستەم، کوشتار، وێرانکاری و ئاوارەیی، سروشتییە کە دڵخۆش دەبن بەوەی کە حیزبەکان یەکبگرن. بەڵام ئەمە هەمیشە ناتوانێت دەردێک دەرمان بکات و هەندێک جار ئەم متمانە و شوێنکەوتنی ڕێبەران، کارەساتی لێکەوتۆتەوە. لێرەدا دوو سێ نموونە دەهێنمەوە:
لەسەرەتایدەیەیحەفتایزاینی: بزووتنەوەی کوردانی عێراق بە ڕێبەرایەتی مستەفا بارزانی، لەلایەن ڕژێمی پاشایەتیی ئێرانەوە بۆ لاوازکردنی ڕژێمی کۆماری عێراق بە سەرۆکایەتی سەدام حسێن، پشتگیرییەکی بەرفراوانی چەکداری و دارایی کرا. بەڵام کاتێک محەممەد ڕەزا شا پەهلەوی و سەدام حسێن ڕێککەوتن، لەناکاو پشتگیرییە دارایی و چەکدارییەکە بڕا و ئەنجامەکەشی ئاوارەبوونی سەدان هەزار کوردی عێراقی بوو.
لەسەرەتایدەیەینەوەدیزاینی: کوردەکان لە کوردستانی عێراق دووبارە ڕاپەڕین و دواتر ئەمریکا لە ئاسمانی کوردستان ناوچەی دژەفڕینی ڕاگەیاند. ئەمە دەرفەتی بۆ کورد ڕەخساند کە قەوارەیەکی خۆبەڕێوەبەری دروست بکەن. بەڵام کاتێک هێزە سەربازییەکانی کورد بەرەو ناوچە نەوتییەکانی کوردستان لە کەرکووک و خانەقین پێشڕەوییان کرد، لەلایەن هێزی ئاسمانیی ئەمریکاوە بۆردومان کران و ناچار بە پاشەکشە کران و کۆنترۆڵی ئەو ناوچە نەوتییانە هەر لە دەستی ڕژێمی سەدامدا مایەوە.
لەساڵی٢٠١٧یزاینی: هەرێمی کوردستانی عێراق کە پێشتر قەوارەکەی پێکهاتبوو و نزیکەی هەموو ناوچە کوردنشینەکانی لەژێر دەستدا بوو، حکوومەتی بارزانی بڕیاری دا ڕیفراندۆمێکی گشتی و ڕەمزی ئەنجام بدات تا خەڵک دەربارەی سەربەخۆیی کوردستان لە عێراق ڕای خۆیان بدەن. ئەم هەنگاوە بووە هۆی کاردانەوەی سەربازیی حکوومەتی ناوەندیی عێراق و میلیشیاکانی سەر بە حکومەتی ئێران بە هەموو هێزیانەوە هێرشیان کردە سەر کەرکووک و ناوچەکانی دیکەی کوردستان. هێزە کوردییەکان ناچار بە پاشەکشە بوون و نزیکەی ٤٠٪ی ناوچە کوردنشین و نەوتییەکان لەوانە کەرکووک و خانەقین لەدەست چوون. ئەمریکا کە بە ڕواڵەت هاوپەیمانی کورد بوو، کەمترین هاوکاریی نەکردن و پشتی تێکردن.
لەشەڕەناوخۆییەکانیسووریا: کە ئەمەیان نەک تەنیا خەڵکی کوردستان بەڵکوو هەموو خەڵکی جیهان لە بیریانە؛ ئەمریکا پشتگیریی ئاسمانیی لە کورد کرد. ئەمە بووە هۆی ئەوەی کوردەکان بە قوربانییەکی مرۆیی گەورە کە نزیکەی ١٣٠٠٠ کەس دەخەمڵێندرێت، توانیان داعش تێکبشکێنن و کانتۆنە خۆبەڕێوەبەرییەکانی خۆیان پێکبهێنن. بەڵام دوای ڕووخانی بەشار ئەسەد و هاتنە سەرکاری حکوومەتی ئیسلامی بە ڕێبەرایەتی “ئەلجەولانی“، ئەمریکا بەرژەوەندییەکانی خۆی لە پشتگیریکردنی ئەودا پێناسە کردەوە و دەستی لە پشتگیریکردنی کورد هەڵگرت. هەمووان ئەمەیان بیستووە، خوێندووەتەوە و یان بینیویانە. لە ماوەی چەند ڕۆژێکدا، لێرەش کوردانی ڕۆژئاوا زیاتر لە ٤٠٪ی ناوچە نەوتییەکانی خۆیان لەدەست دا.
ئێستا دەبێ لەگەڵ خۆمان ڕاستگۆ بین و بپرسین: کێ خیانەتی لە کێ کرد؟ ڕێبەرەکان یان ئەمریکا؟
ئێستا نۆرە گەیشتووەتە کوردستانی ئێران. شەڕی سێ دەوڵەتی فاشیستی، کە بۆ خەڵکی سەرتاسەری ئێران کارەساتبار و وێرانکەرە، دەبێ بە توندی و بێ هیچ وەهمێک شەرمەزار بکرێت. شەڕ قێزەونە. لە کاتێکدا هەموو خەڵکی شەریف و ئازادیخوازی جیهان، بیرمەندان، کەسایەتییە ناسراوە ئەدەبی و هونەرییەکان، هەموو ئەوانەی تەنانەت بۆ یەک ڕۆژیش زیان و نەهامەتییەکانی شەڕیان بینیوە، و هەروەها هەموو کۆمۆنیست و چەپەکانی جیهان، شەڕی ئەم دواییە شەرمەزار دەکەن.
لەلایەکی دیکەوە، ڕەوتە فاشیست و دژەخەڵکییهکانی وەک سەڵتەنەتخوازەکان، هەر ڕۆژ لە شەقامەکانی واشنتۆن و ئەورووپا، بەدوور لە شەڕ، خەریکی ئاهەنگگێڕان و هەڵپەڕکێن و هانی “مامەکانیان” (ترامپ و ناتانیاهۆ) دەدەن بۆ بۆردومانی زیاتر و زیانە مرۆییەکان، لەوانە کوژرانی ١٧٠ کیژۆڵە تەنیا لە یەک بۆردوماندا، پشتگوێ دەخەن.
لە وەها بارودۆخێکدا، کەسانێک لە کوردستاندا پەیدا دەبن کە بەو پاساوەی ڕژێمی فاشیستی ئێران زۆر فاشیستترە لە ئەمریکا و ئیسرائیل، بەرگری لە شەڕ دەکەن و ڕەخنە لە کۆمەڵەی کۆمۆنیست دەگرن کە بۆچی ناچێتە ناو ئەو هاوپەیمانییەی ٦ حیزبەکە.
خەڵکی خەباتکاری ئێران و کوردستان و حیزبە سیاسییەکانیان لە هەمان کاتدا دەبێ بزانن کە ئەم شەڕە کە نە لە دەسپێکی و نە لە کۆتاییپێهێنانیاندا هیچ دەورێکیان نییە، لە هەمان کاتدا دەرفەتێک دەداتە خەڵکی ئێران و کوردستان تا بۆ ڕووخاندنی ڕژێمی ئێران هێزەکانی خۆیان ڕێکبخەن. نابێ ڕێگە بدرێت دیکتاتۆرێکی نوێ جێگەی دیکتاتۆری پێشوو بگرێتەوە. ئەمە لە توانای خەڵکدایە کە حکوومەتێکی دیموکراتیک جێگیر بکەن کە مافی هەموو نەتەوەکانی نیشتەجێی ئێران بکاتە ڕاستی.
لە کوردستان، ٦ حیزبە کوردستانییەکە بە پەلە و وەک دەوترێت، جگە لە زەروورەتی مێژوویی و ئامانجە نەتەوەییەکان، بە یارمەتی دارایی و چەکداریی ئەمریکا پێکهاتوون و باس لە کردنەوەی بەرەیەکی زەمینی بۆ کۆنترۆڵکردنی ناوچە و شارەکانی کوردستان دەکرێت. سەرۆک کۆماری ئەمریکا، ترامپ، چەندین جار لە همان سەرەتاوە بە ئاشکرا جەختی لەسەر کردەوە. ئێستا کەمتر باس لەم بابەتە دەکرێت. وەک دەردەکەوێت تورکیا و هەرێمی کوردستانی عێراق بە توندی دژایەتییان کردووە.
بۆ ئەوەی بابەتەکە درێژە نەکێشێت، هەوڵ دەدەم ئەنجامگیرییەکی کورت بخەمە ڕوو:
نەچوونی کۆمەڵە، ڕێکخراوی کوردستانی حیزبی کۆمۆنیستی ئێران ـ بۆ ناو هاوپەیمانیی ئەو ٦ حیزبە کوردستانییە، دەبێ بە نیشانەیەکی باش وەربگیرێت و لەلایەن هەموو ئازادیخوازە خەباتکارەکان لە کوردستان و ئێران بە هەموو هێزەوە پشتگیری لێ بکرێت. هەموو چەپەکان و ئەوانەی تەمەنیان لە خەبات دژی ستەم و سەرەڕۆیی ئیسلامی بەسەر بردووە و باشترینەکان بۆ خەڵکی کوردستانی ئێران بە ئاوات دەخوازن، هەموو ئەوانەی دیموکراسی و مافی ڕادەربڕینی خەڵک بە ڕەسمی دەناسن و چاوەڕوانییان هەیە کە ڕۆڵەکانیان لە نێو حیزبە سیاسییە چالاکەکانی کوردستان و هەموو ئەو کەسانەی کە لە شۆڕشی «ژن، ژیان، ئازادی»دا لە لایەن سەرجەم کۆمەڵانی خەڵکی ئێرانەوە
پشتیوانییان لێ کرا و لە زومرەی پێشڕەوانی ئەو شۆڕشە جەماوەرییە بوون، یاری بە چارەنووسیان نەکرێت. بەڵێ، دەبێ هەموو خەڵکی کوردستان دەست لە ناو دەستی خەڵکی خەباتکاری ئێران، بۆ تێپەڕبوون لە ڕژێمی کۆماری ئیسلامی یەکگرتوو بن. ئەمە کەم زیانترین، ژیرانەترین و لە هەمان کاتدا دڵنیاترین ڕێگەیە بۆ وەدیهێنانی مافی دیاریکردنی چارەنووسی نەتەوەی کورد و نەتەوەکانی دیکەی نیشتەجێی ئێران.
ڕەنگە ئەو ٦ حیزبە بەهۆی ئەوەی کە تووشی جۆرێک لە وەهم بووبێتن بەرامبەر بە ئەمریکا، هەڵەیان کردبێت، بەڵام با ڕێگە بدەین لانیکەم حیزبێکی دیکەی جەماوەریی، واتە کۆمەڵە، لە کاتی هاوکارییە دیاریکراوەکانی لەگەڵ ئەو ٦ حیزبە لە خەباتی خەڵکی کوردستاندا، بەبێ یارمەتی ئەمریکا و بە پشتبەستن بە خەڵکی تێکۆشەری کوردستان و ئێران، درێژە بە ڕێبازی خۆی بدات و ڕۆژ بە ڕۆژ پێگە کۆمەڵایەتییەکەی پەرەبستێنێ. ئەم کارە زۆرتر لە بەرژەوەندیی سەربەخۆی نەتەوەی کورد دایە.
نابێت گوشار بخرێتە سەر کۆمەڵە بۆ چوونە پاڵ ئەو ٦ حیزبە، بەڵکوو دەبێ ئەوە قبووڵ بکرێت کە تاکتیک و ستراتیژی جیاواز هەن و بە ڕەسمی بناسرێن. حیزبەکان و خەڵکی کوردستان ئەو ئەزموونە مێژووییانەی کە باس کران هەرگیز لەبیر ناکەن و دەبێ توانای مانۆڕدانیان هەبێت و شیکاری و هەڵوێستە جیاوازەکان بە بەشێک لە خەباتی خۆیان بزانن. هەر کەسێک دەتوانێت خۆی لەگەڵ ئەم یان ئەو هەڵوێست ببینێتەوە، ئەمە تەواو سروشتییە. گرنگ ئەوەیە هەموو ئەم ڕوانگانە بە ئاسایی و تەنانەت بە پێویست بزانین. نابێت هیچ کەسێک سوود لەم هەڵوێستە جیاوازانە وەربگرێت بۆ ئەوەی هێرشی ناڕەوا و نابەرپرسانە بکاتە سەر ڕکابەرە حیزبییەکانی، یان حیزبێکی دیاریکراو.
بۆیە نابێت ڕیسک بکرێت و بە واتایەکی دیکە: هەموو هێلکەکانتان مەخەنە ناو یەک سەبەتەوە
