“ڕه‌جه‌ب ته‌یب ئه‌ردۆغان” سه‌رۆك كۆماری توركیا ڕۆژی پێنجشه‌ممه ١٠ی جۆزه‌ردان، جه‌ختی كرده‌وه كه ئه‌گه‌ر ئیداره‌ی خۆبه‌ڕیوه‌به‌ری ڕۆژئاوای كوردستان له ناوچه‌كانی ژێر ده‌سه‌ڵاتیان هه‌ڵبژاردن به‌ڕێوه ببه‌ن، ئه‌وه له زۆترین كات دا هێرش ده‌كه‌نه سه‌ریان.
ماوه‌یه‌ك له‌وه‌به‌ر نوێنه‌رانی مه‌جلیسی ئیداره‌ی خۆبه‌ڕێوه‌به‌ری ڕۆژئاوای كوردستان یاسانامه‌ی كۆمه‌ڵایه‌تی باكوور و ڕۆژهه‌ڵاتی سووریای په‌سه‌ند كرد و بڕیاری دا هه‌ڵبژاردنی شاره‌دارییه‌كان به‌ڕێوه بچێت. ئێستا كاتی هه‌ڵبژاردنی شاره‌دارییه‌كان له ڕۆژئاوای كوردستانه و سه‌رۆك كۆماری توركیا هه‌ڕشه‌ی داگیركردنی ناوچه‌یه‌كی به‌رفراوانتر ده‌كات. هه‌ر چه‌ند هه‌ڵبژاردنه‌كان له حه‌سه‌كه، ڕه‌قه، ده‌یره‌زوور و ڕۆژهه‌ڵاتی حه‌له‌ب ده‌ستی پێكردووه، به‌ڵام ێشتا مه‌ترسی هێرشی توركیا له ئارادایه. ڕۆژی ڕابردوو، به‌رپرسانی خۆبه‌ڕێوه‌به‌ری ڕۆژئاوای كوردستان هاوڕێ له‌گه‌ڵ هۆزه عه‌ره‌به‌كان به‌یاننامه‌یه‌كی هاوبه‌شیان بڵاو كرده‌وه و ڕایانگه‌یاند كه هه‌ڵبژاردنی شاره‌دارییه‌كان پێوه‌ندی به وڵاتانی دراوسێوه نییه و مه‌ترسی بۆ سه‌ر هیچ وڵاتێك ساز ناكات.
