شه‌وی هه‌ینی ١٣ی ڕێبه‌ندان، ئه‌مرێكا له وڵامی هێرشی میلیشیاكانی سه‌ر به كۆماری ئیسلامی بۆ سه‌ر بنكه‌ی ته‌نه‌ف كه بووه هۆی گیانله‌ده‌ستدان و برینداربوونی ٤٣ كه‌س، بنكه‌كانی سپای قودس و حیزبۆڵای عێراقی كرده ئامانج و به‌هۆیه‌وه ده‌یان كه‌س كوژران و بریندار بوون.
له ڕاگه‌یاندی سێنتكام دا هاتووه كه ٨٥ ئامانج، چوار بنكه له مه‌یادین، ده‌یره‌زوور و ئه‌بووكه‌ماڵی سووریه و سێ بنكه له ئوستانی ئه‌نباری عێراق كراوه‌ته ئامانج و ئه‌مه سه‌ره‌تای هێرشه‌كانه و درێژه‌ی ئه‌بێت. به‌پێی زانیارییه‌كان، ٢٨ كه‌س له سووریه كوژران و بریندار بوون كه زۆربه‌یان له هێزه‌كانی زه‌ینه‌بیوون و فاتمیۆن بوون. هه‌وره‌ها حه‌شدی شه‌عبی عێراق ڕایگه‌یاندووه كه زیاتر له ده كه‌س له هێزه‌كانیان له هێرشه‌كانی ئه‌مریكادا كوژران و بریندار بوون. شایانی باسه كه هه‌ندێك له سه‌رچاوه‌كانی هه‌واڵ باس له كوژرانی “قاسم مۆسلح” فه‌رمانده‌ی حه‌شدی شه‌عبی و “عه‌باس ده‌ڕاجی” به‌ڕێوه‌به‌ری لۆجستیكی حه‌شدی شه‌عبی له هێرشه‌كان ده‌كه‌ن.
