33
پاڕله‌مانی كانادا ڕۆژی چوارشه‌ممه ١٩ی گوڵان، به زۆرترین ده‌نگ لایه‌حه‌ی دانانی سپای پاسداران له لیستی گرووپه تیرۆریستیه‌كانی په‌سه‌ند كرد.
به‌پێی ڕاپۆرته‌كان، مه‌جلیسی گشتی كانادا به ٣٢٧ ده‌نگی ئه‌رێ و بێ هیچ ده‌نگێكی نا ئه‌و گه‌ڵاڵه‌یه‌ی په‌سه‌ند كردووه. ئه‌و لایه‌حه له‌لایه‌ن كۆمیته‌ی دادگوسته‌ری مه‌جلیسی نوێنه‌رانی كاناداوه پێشنیار و داوای له ده‌وڵه‌ت كردبوو كه سپای پاسداران وه‌كوو ڕێكخراوه‌یه‌كی تیرۆریستی بناسێنێت. مانگی ڕابردوو و پاش هێرشی مووشه‌كی و په‌هبادی سپای پاسداران بۆ سه‌ر ئیسڕائیل حیزبه نه‌یاره‌كانی جاستین تڕۆدۆ و بنه‌ماڵه‌ی دادخوازان، نوێنه‌رانی مه‌جلیس و حیزبه ئۆپۆزسیۆنه‌كانی ئێران گوشاره‌كانیان بۆ سه‌ر ده‌وڵه‌ت زیاد كرد بۆ ئه‌وه‌ی سپای پاسداران وه‌كوو گرووپێكی تیرۆریستی بناسێنێت.
