ڕۆژی شه‌ممه ١٢ی جۆزه‌ردان، ئیتحادییه‌ی ئازادی كرێكارانی ئێران و سه‌ندیكای كرێكارانی حه‌وت ته‌په له دوو په‌یامی جیاجیادا، سه‌ره‌خۆشی خۆیان ئاراسته‌ی بنه‌ماڵه‌ی موزه‌فه‌ر ساڵح نیا و هه‌موو كۆمه‌ڵگه‌ی كرێكاری كوردستان و ئێران كرد.
ئیتحادییه‌ی ئازادی كرێكارانی ئێران و سه‌ندیكای كرێكارانی شیركه‌تی نه‌یشه‌كه‌ری حه‌وت ته‌په له په‌یامه‌كانیان دا وێڕای ئاماژه پێدان به چه‌ند ده‌یه تێكۆشانی مۆزه‌فه‌ر ساڵح نیا و بانگهێشت و ده‌ستبه‌سه‌ركرانی له‌لایه‌ن ڕژیمه‌وه، كۆچی دوایی ئه‌و چالاكه كرێكارییه‌یان وه‌كوو خه‌سارێكی گه‌وره بۆ كۆمه‌ڵگه‌ی كرێكاری كوردستان و ئێران ناو برد و په‌یمانیان له‌گه‌ڵ ئاواته‌كانی نوێ كرده‌وه. ئیتحادییه‌ی ئازادی كرێكارانی ئێران و سه‌ندیكای كرێكارانی نه‌یشه‌كه‌ری حه‌وت ته‌په له كۆتایی په‌یامه‌كه‌یاندا سه‌ره‌خۆشی خۆیان ئاراسته‌ی بنه‌ماڵه، كه‌س و كار و هه‌موو كۆمه‌ڵگه‌ی كرێكاری كوردستان و ئێران كرد و خۆیان به شه‌ریكی خه‌میان زانی.
