هاوکات لەگەڵ بیستەمین كارزاری نا بۆ ئێعدام، کە بە مەبەستی ده‌ربڕینی ناڕه‌زایه‌تی له ئاست ئێعدامی به‌ندكراوان له ئێران ڕێكخراوه، ژمارەیەک لە زیندانیانی سەقز و مەشهەد پەیوەست به‌و كارزاره بوون و مانیان له خواردن گرت.
بەپێی زانیارییەکان، بەندکراوانی بەندیخانەکانی ئێڤین، قزلحەسار، ناوه‌ندی کەرەج، خۆڕەم ئاوا، مەشهەد، سەقز، خۆی و نەغەدە لە درێژەی بەڕێووەچوونی مانگرتنەکانی سێشەممەی نا بۆ ئێعدام، بۆ بیستەمین حەفتە، مانیان لە خواردن گرت. ئەو بەندکراوانە له بەیاننامەیەک دا ڕایانگەیاند: کۆماری ئیسلامی حەفتەی ڕابردوو به‌لانیکەم ٨ کەسی لە سێدارە داوه و بە دەرکردنی سزای لەسێدارەدان بۆ مامۆستا “محەممەد خزرنژاد” کە تەنیا بەرگریی لە بزووتنەوەی ڕەوای خەڵک لە ساڵی ١٤٠١دا کردبوو، سەلماندی کە لە هیچ دۆخێکدا دەست لە سەپاندن و جێبەجێکردنی سزای ئێعدام هەڵناگرێ. تەنانەت لە کاتی “شانۆی هەڵبژاردنەکان”دا ڕژیمی سه‌ركوتگه‌ری ئیسلامی وازی لەسەرکوت و لەسێدارەدان نەهێناوە و ته‌نیا ڕێگه‌ی به‌رنگاربوونه‌وه له‌گه‌ڵ حكوومه‌ت، په‌ره‌پێدان به كارزاره‌كانی نا بۆ ئێعدامه.
