به‌یانی شه‌ممه ٢٧ی گه‌لاوێژ، په‌ره‌ستارانی مه‌شهه‌د په‌یوه‌ست به مانگرتنی سه‌راسه‌ری په‌ره‌ستارانی ئێران بوون.
زیاتر له حه‌فته‌یێكه كه په‌ره‌ستاران و كادری ده‌رمانی نه‌خۆشخانه‌كانی ئێران دژ به دۆخی خراپی پیشه‌یی و مه‌عیشه‌تی ده‌ستیان له كار كێشاوه و ڕۆژ له دوای ڕۆژ ئه‌و مانگرتنه گه‌وره‌تر ئه‌بێت. له ڕۆژانی ڕابردوودا، په‌ره‌ستاران له شاره‌كانی شیراز، یه‌زد، بووشێهر، كرماشان، شاباد، جه‌هرۆم،ئاباده، كه‌ره‌ج، ئێقلید، ئه‌راك، ساری، ڕه‌شت، به‌نده‌رعه‌باس و كه‌نگان ده‌ستیان له كار كێشاوه و وێڕای به‌ڵێنی به‌رپرسانی ڕژیم بۆ جێبه‌جێكردنی داخوازییه‌كان درێژه‌یان پێ داوه. په‌ره‌ستارانی ئێرانی خوازیاری زیادكردنی ئاستی حه‌قده‌ست، چوونه‌سه‌ره‌وه‌ی ته‌عرفه‌ی په‌ره‌ستاری، كه‌مكردنه‌وه‌ی ساعه‌تی كار، ته‌زمینی ئه‌منیه‌تی پیشه‌یی، پێدانی ئیزافه‌كاری و كارانه، دامه‌زراندنی هێزی كاری نوێ و ڕێگری له كۆچكردنی كادری ده‌رمان بۆ ده‌ره‌وه‌ی وڵات بوون.
