دانیشتووانی ناوچه‌ی لۆریانی فه‌ڕانسه، ڕۆژی یه‌كشه‌ممه ١٢ی ڕه‌شه‌مه، دژ به بڵاوكردنی نه‌فه‌رت له په‌نابه‌ران و سه‌رهه‌ڵدانی فاشیزم له‌و وڵاته ڕژانه سه‌ر شه‌قام و خۆپێشاندانیان كرد.
به‌شداربووانی ئه‌و چالاكییه به كۆبوونه‌وه له‌به‌رده‌م ناوه‌ندێكی په‌روه‌رده به‌یاننامه‌یه‌كیان بڵاو كرده‌وه و تێدا ڕایانگه‌یاند: گرووپه فاشیسته‌كانی فه‌ڕانسه به شێوه‌ی سیستماتێك هێرشیان كردووه‌ته سه‌ر كرێكارانی په‌نابه‌ری كورد و تورك له شاری پاریس و چه‌ند كه‌سیان بریندار كردووه. یه‌ك حه‌فته به‌دوای ئه‌و ڕووداوه، ئه‌ندامێكی شۆرای شار كه له ئاست هه‌ڵسووكه‌وتی فاشیسته‌كان ناڕه‌زایه‌تی ده‌ربڕیبوو، په‌لامار دراوه. ئه‌و هێرشانه له‌لایه‌ن بۆرژوازی ده‌سه‌ڵاتداره‌وه پاڵپشتی ده‌كرێت و ئه‌بێ كۆتایی پێ بێت. شایانی باسه كه هاوكات له‌گه‌ڵ ئه‌و خۆپێشاندانه، چه‌ند گرووپی ڕاسیست هێرشیان كردووه‌ته سه‌ر ده‌فته‌ری حیزبه سۆسیالیسته‌كان و له‌گه‌ڵ هێزه‌كانی پۆلیس به شه‌ڕ هاتوون.
