گیانبه‌ختكردنی منداڵێكی ته‌مه‌ن ٧ ساڵ به‌هۆی ئه‌شكه‌نجه‌ی باوكی له‌ بۆكان

له‌ ڕۆژانی ڕابردوودا، كچێكی ته‌مه‌ن ٧ ساڵی خه‌ڵكی بۆكان به‌ ناوی “نیان چه‌لیانی” به‌ هۆی ده‌ستدرێژی سێكسی و ئه‌شكه‌نجه‌دان له‌لایه‌ن باوك و زڕدایكیه‌وه‌ گیانی له‌ده‌ست داوه‌.

چه‌ند ڕۆژ له‌مه‌وبه‌ر باوك و دایكی نیان كچه‌كه‌یان بۆ ئۆرژانسی بۆكان گواسته‌وه‌ و كاتێك ده‌یانویست له‌ نه‌خۆشخانه هه‌ڵ بێن، له‌لایه‌ن پاسه‌وانه‌كانی ئه‌و نه‌خۆشخانه‌وه‌ ده‌ستبه‌سه‌ر و ڕاده‌ستی پۆلیس كران. كاتێك پزیشكانی ئۆرژانسی بۆكان نیانیان مه‌عاینه‌ ده‌كرد، ئاسه‌واری ده‌ستدرێژی سێكسی و داخ كردنیان به‌سه‌ر جه‌سته‌ی ئه‌و كچه ته‌مه‌ن ٧ ساڵه‌وه‌ بینی و ڕه‌وانه‌ی شاری ورمێیان كرد. نیان پاش گواسته‌وه‌ بۆ نه‌خۆشخانه‌ی شاری ورمێ به‌هۆی سه‌ختی برینه‌كانی گیانی له‌ده‌ست دا و باوكی موعتاد و زڕدایكی ده‌ستبه‌سه‌ر و ڕاده‌ستی دادگا كران.