به‌پێی ڕاپۆرته‌كان، په‌ره‌ستارێكی گه‌نجی نه‌خۆشخانه‌ی ته‌ئمیین ئیجتیماعی بووشێهر به ناوی مه‌دینه عه‌باسی له كاتی كاركردن دا به‌هۆی گوشاری كاری تووشی جه‌ڵته‌ی مێشك بووه و گیانی له‌ده‌ست داوه.
به وته‌ی سه‌رچاوه‌كانی هه‌واڵ، بنه‌ماڵه‌ی ئه‌و په‌ره‌ستاره زه‌حمه‌تكێشه جه‌رگ و هه‌ر دوو گورچیله‌ی كچه‌كه‌یان به نه‌خۆشه‌كانی دیكه به‌خشیوه و مه‌راسیمی پرسه و سه‌ره‌خۆشییه‌كه‌ی به به‌شداری به‌رینی خه‌ڵك له شاری بووشێهر به‌ڕێوه چووه. شایانی باسه كه له ماوه‌ی یه‌ك ساڵی ڕابردوودا كادری ده‌رمانی ئێران به‌رده‌وام له ئاست دۆخی خراپی پیشه‌یی و مه‌عیشه‌تی ناڕه‌زایه‌تیان ده‌ربڕیوه، به‌ڵام ده‌وڵه‌تی سه‌ركوتگه‌ری ئیسلامی هیچ بایه‌خێكی پێ نه‌داون. له‌و ماوه‌یه‌دا چه‌ند په‌ره‌ستار به‌هۆی گوشاری كاری گیانیان له‌ده‌ست داوه و به هه‌زارن په‌ره‌ستار و پزیشك بۆ ده‌ره‌وه‌ی وڵات كۆچیان كردووه.
