ڕۆژانی یه‌كشه‌ممه و دووشه‌ممه ٦ی و ٧ی جۆزه‌ردان، دوو كرێكار له شاره‌كانی مهاباد و میاندووئاو به‌هۆی نه‌بوونی ئیمه‌نی شوێنی كار گیانیان له‌ده‌ست دا و شه‌ش كرێكاری دیكه له‌و دوو شاره و شاره‌كانی ئیزه و كه‌ره‌ج به‌سه‌ختی بریندار بوون.
به‌پێی ڕاپۆرته‌كان، كرێكارێكی مێرمنداڵی ته‌مه‌ن ١٧ ساڵ له كاتی كاركردن له بینایه‌كی نیوه‌كاره له شاری كه‌ره‌ج به‌هۆی به‌ربوونه‌وه له به‌رزایی به‌سه‌ختی بریندار بووه. له شاری ئیزه كرێكارك به‌هۆی كه‌وتنه نیو مه‌خزه‌نێكی ئاو به‌سه‌ختی بریندار و ڕه‌وانه‌ی نه‌خۆشخانه كرا. له شاری مهاباد به‌هۆی داڕمانی دیوار كرێكارێكی ته‌مه‌ن ٥٠ ساڵ گیانی له‌ده‌ست دا و سێ كرێكاری دیكه‌ش بریندار بوون. له میاندووئاو هه‌روه‌ها دوو كرێكار له‌وانه منداڵێكی كار له سه‌ر باڵابه‌ر كه‌وتنه خواره‌وه و یه‌كێكیان گیانی له‌ده‌ست دا و منداڵه‌كه‌ش به‌سه‌ختی بریندار و له نه‌خۆشخانه به‌سته‌ری كرا.
