بەمجۆرە بە ئاگاداریتان دەگەیەنین کە ڕۆژی پێنجشەممە، ١٢ی ڕێبەندانی ١٤٠٢، بەرامبەر بە ١ی فێوریەی ٢٠٢٤، کۆبوونەوەیەکی هاوبەش لە نێوان ڕێبەرایەتی حیزبی کۆمۆنیستی ئێران و حیزبی کۆمۆنیستی کرێکاریی ئێران بەڕێوەچوو.
تەوەری سەرەکی ئەم دیدارە بریتی بوو لە هەڵسەنگاندنی بارودۆخی سیاسی ئێستای ئێران و ڕێکخستنی هاوکاری و پەیوەندییەکانی نێوان هەردوولا.
سەبارەت بە بارودۆخی سیاسی، هەردوولا جەختیان لەسەر ئەو واقیعییەتە کردەوە کە کۆمەڵگای ئێران و ڕژیمە دەسەڵاتدارەکەی، هەردووکیان بە دۆخێکی هەستیاردا تێپەڕ دەبن. حکوومەتی ئیسلامی ئێران پتر لە هەرکاتێک لە گێژاوی قەیرانە بێ وێنەکانی دا گرفتار بووە. کۆمەڵگا لە مێژە هیوای بە ڕیفۆرم و گۆڕانکاری لە ناوخۆی ڕژیمدا لەدەستداوە و ئاخێزی شۆڕشگێڕانەی ژینا، خەباتی کۆمەڵانی خەڵکی ئازادیخوازی، لەپێناو ڕووخاندنی ڕژیمی ئیسلامی و هێنانەدی گۆڕانکاری لە پێکهاتەی کۆمەڵایەتیدا، گەیاندۆتە ئاستێکی نوێ. لە دڵی ئەم هەلومەرجە هەستیار و ڕوو لە ئاڵوگۆڕەدا، خەباتی جەماوەری ئازادیخواز بووەتە هۆی شکڵگرتنی بزووتنەوە گەلێکی کۆمەڵایەتی بە ناورۆک چەپ و هەڵگری ویست داخوازیی پێشکەوتنخوازانە. هەردوولا جەختیان لەسەر ئەوە کردەوە کە پێویستە ئەم هەلومەرجە بە هەند وەربگیرێ و بەمەبەستی پێکهێنانی ئەڵتەرناتیڤێکی حکوومەتی چەپ لە کۆمەڵگا و لە پرۆسەی شۆڕش لەدژی کۆماری ئیسلامیدا، پشت بەم هێزە کۆمەڵایەتییە ببەسترێت.
لە بواری ڕێکخستنی پەیوەندیی و هاوکارییەکانی نێوانیان، هەردوولا وێڕای هەڵسەنگاندنی ئەرێنی سەبارەت بە هاوکارییەکانی تا ئێستا، لەسەر گرنگی پەرەپێدان و پێشخستنی هەرچی زیاتری کار و چالاکییە هاوبەشەکان بە مەبەستی بەهێزکردنی بزووتنەوە پێشکەوتنخواز و ڕادیکاڵەکان، لەوانەش ئەو بزووتنەوەی ئێستای دژ بە سزای لەسێدارەدان، پێداگرییان کرد.
هەردوولا لەسەر ئەوە ڕێککەوتن کە ئەم کۆبوونەوانە بەمەبەستی ئاڵوگۆڕی بیروڕا و هاوکاری زیاتر، بەردەوام بن. هەروەها بڕیاردرا لە داهاتوویەکی نزیکدا مێزگردێکی تەلەفزیۆنی ساز بکرێت بەمەبەستی وردکردنەوە و خستنەڕووی ناوەڕۆکی گفتوگۆکان و ڕوونکردنەوەی بۆچوونی هەردوولا سەبارەت بەو خاڵانەی سەرەوە.
کۆمیتەی ڕێبەریی حیزبی کۆمۆنیستی ئێران
کۆمیتەی ناوەندی حیزبی کۆمۆنیستی کرێکاریی ئێران
١٢ی ڕێبەندانی ١٤٠٢
١ی فێوریەی ٢٠٢٤
