یەکەم ڕۆژی مانگی خاکەلێوە بەرامبەر بە ٢٠ی مارس، لەلایەن ڕێکخراوی نەتەوە یەکگرتووەکانەوە وەک ڕۆژی جیهانی شادی ناوزەد کراوە. بەم بۆنەیەوە ئەم ڕۆژە لە زۆرێک لە وڵاتانی جیهان جەژن و سیمینار و کۆنفرانسی پەروەردەیی بەڕێوەدەچێت. ڕۆژی جیهانی شادی دەرفەتێکە بۆ بیرکردنەوە لە گرنگی خۆشی و بەختەوەری لە ژیانی مرۆڤەکاندا. مەبەست لە دیاریکردنی ڕۆژێکی لەم شێوەیە، بریتییە لە هاندان بۆ هەرچی زیاتر شاد و دڵخۆش بوونی مرۆڤەکان و خەبات و بەرەوڕووبوونەوە لەگەڵ خەمۆکییەکانی سەرچاوەگرتوو لە کێشە و تاڵی و ناخۆشییەکانی ژیانی ڕۆژانەی مرۆڤەکان. دەروونناسییە کۆمەڵایەتییەکان دەریانخستووە کە شادی و خۆشی لە شێوازە،جۆراوجۆرەکانی وەک سەما و هەڵپەڕکێ، ئاواز و مۆسیقا و ڕێوڕەسمی جەژن و بۆنە جۆراوجۆرەکان، دەتوانێت یارمەتیدەر بێت بۆ کەمکردنەوەی گوشاری دەروونی و بەهێزکردنی سیستەمی بەرگری لەش و درێژکردنەوەی تەمەن. هەروەها شادی دەتوانێت ئەو مرۆڤە هاوچارەنووسانەی کە دەبنە هاوبەشی شادی و خۆشی یەکتر، یەکگرتووتر بکات. ڕێوڕەسمەکانی نەورۆز لە ئێران و بە تایبەتی لە کوردستان لە زومرەی ئەو نەریتە پێشڕەو و پڕ بایەخە جەماوەرییانەن کە خەڵک بە وشیارییەوە بەمەبەستی بەرەپێدان بە شادی و خۆشی کەڵکی لێ وەردەگرن. وەک نەریتێکی جیکەوتوو، لە ڕۆژانی جەژندا خەڵک سەردانی بنەماڵە ماتەمبارەکان و بەتایبەت بنەماڵەی گیانبەختکردووانی دەستی ڕژیمی ئیسلامی و جەژن و شادی خۆیان لەگەڵدا بەش دەکەن.
خەڵکێکی کە لە پەرەپێدانی فەرهەنگی ماتەمینی، شینگێری و لەخۆدان بێزار بوون، لە هەر دەرفەتێکدا بە سەما و هەڵپەڕکێ و دەربڕینی شادی و خۆشی، دەچنە شەڕی ئەو فەرهەنگە کۆنەپەرستانە و دواکەوتوووانەی کە کۆماری ئیسلامی لە ڕێگەی ناوەند و ڕاگەیەنەرە گشتییەکانەوە بانگەشەی بۆ دەکات و پەرەی پێدەدات. ڕژیمی ئیسلامی لە جەژن و شادی خەڵک دەترسێت. ئەم ڕژیمە نەک هەر لە نەورۆزدا، بەڵکوو بە درێژایی ساڵ نایهەوێ بزەی شادی و خۆشی بکەوێتە سەرلێوی خەڵک، خەمۆکی و نائومێدی و بێهیوایی خەڵک، هۆکار دەبێت بۆ درێژەی تەمەنی کۆماری ئیسلامی. ئەم ڕژیمە کۆمەڵگایەکی ملکەچ و گوێڕایەڵی دەوێت کە تێیدا مرۆڤەکان لە ئاست ئەو چارەنووسەی کە ڕژیم بۆی دیاریکردوون، سەر دابنەوێنن. ڕێوڕسمەکانی هاوسەرگیری بە بیانووی ئەوەی کە تێیاندا حیجابی ئسلامی ڕەچاو ناکرێت و مەودای نێوان ژن و پیاو لەبەرچاو ناگیرێت، تێکدەدات. ڕێگری دەکات لە بەڕێوەچوونی کۆنسێرت و مۆسیقا. ئەو گەنج و لاوانەی کە لە بۆنە جۆراوجۆرەکاندا لەدەوری یەکتر کۆدەبنەوە و ساتێکی خۆش بەیەکەوە بەسەر دەبەن، دەداتە بەر ئەزیەت و ئازار و سوکایەتیان پێدەکات. لە ڕاستیدا ئەگەر دونیا بە ویستی ڕژیمی ئیسلامی ئێران بوایە، ئەم کۆمەڵگایە دەبوو بە درێژایی ساڵ و هەموو ڕۆژێک بە بیانووی جۆراوجۆر ڕەشپوش و ماتەمبار بێت. بەڵام زۆربەی هەرەزۆری خەڵکی ئەم کۆمەڵگایە لە ئاست ڕژیمی ئیسلامیدا سەریان دانەنەواندووە. هەروەک دەبینین، سەرەڕای هەڕەشە و تەنانەت گرتن و زیندانی کردنیش لەم پێوەندییەدا، خەڵک لە سەرتاسەری ئێران هیچ گرنگییەک بەو دژایەتیانە نادەن. مۆسیقا و هونەر و گۆرانی و سەما و شادی لە حەشارگەکان هاتوونەتە دەرەوە. مەراسمەکانی چوارشەممە سووری و نەورۆز لە زومرەی ئەوانەن. لە بەرامبەر فەرهەنگی کۆنەپەرستانەی زاڵدا، خۆڕاگریی پێشکەوتنخوازانە سەریهەڵداوە.
حکوومەتی ئیسلامی هەوڵ دەدات سەرجەم بوارەکانی وەرزشی، هونەری، فەرهەنگی، پەروەردەیی و تەنانەت زانستیش کۆنترۆڵ بکات و لەپێناو خزمەت بە ئامانجی کۆنەپەرستانەی خۆیدا بەکاریان بهێنێت. لەم پێوەندییەدا سەما و هەڵپەڕکێ بۆ ڕژیمی ئیسلامی لە زومرەی بابەتە قەدەغەکراوەکانە و کەسایەتییەکانی ئایینی شیعەش لە زۆرێک لە فەتواکانیاندا بە “کردەوەیەکی حەرام” و “ورووژێنەر” ناویان بردووە. بۆ نموونە بە پێی فەتوای خومەینی سەما و هەڵپەڕکێ “بەتەواوی حەرام” کرا. لەمڕووەوە سەما و هەڵپەڕکێ لە بازنەی هونەرە ڕێگە پێدراوەکان لەلایەن دامەزراوە هونەری و فەرهەنگییەکانی دەوڵەتەوە دوورخرایەوە. ئەگەرچی ڕژیم هەرگیز نەیتوانی پێش بە بەڕێوەچوونی جۆرەکانی سەما و هەڵپەڕکێی ناوچەیی بگرێت، بەڵام سەما و هەڵپەڕکێ بە واتای هونەریی پەتی، دوای چل و پێنج ساڵ هێشتا هەروا قەدەغەیە و شەڕی کۆماری ئیسلامی لەگەڵ مامۆستایان و ڕاهێنەرانی ئەو هونەرە و سەماکاران، بەردەوامە. لە ماوەی ساڵەکانی دوای سەرکەوتنی شۆڕشی ١٣٥٧، زۆر جار سەماکاران و ڕاهێنەرانی ئەم هونەرە دەستبەسەر کراون و شوێنەکانی ڕاهێنانی سەما داخران. ئەگەرچی شەڕی کۆماری ئیسلامی لەگەڵ ژنان، سەما و هەڵپەڕکێ، شادی و خۆشی و ژیان هەروا بەردەوامە، بەڵەم حکوومەت نەیتوانیوە نۆرم و شێوازەکانی خوازراوی خۆی بەسەر ژیانی خەڵکدا بسەپێنێت. بەتایبەتی ئەوەی کە ئەمڕۆ لەم بوارەدا زۆر دیار و سەرنجڕاکێشە، ئەو واقیعییەتەیە کە لەو کەش و هەوایەی کە شۆڕش “ژن، ژیان، ئازادی” خوڵقاندوویەتی، ئەم بەرخۆدان و خۆڕاگرییە ئاستێکی گەلێک بەربڵاوتر و بوێرانەتری بەخۆیەوە گرتووە.
خەڵک لەم بابەتەوە ئەزموونێکی زۆريان بەدەستهێناوە و بە شێوازی جۆراوجۆر لە کات و شوێنی گونجاودا، فەتوا و یاساغەکانی ڕژیم تێدەپەڕێنن. کۆماری ئیسلامی لە بەرامبەر شادی و خۆشحاڵی خەڵکدا سەری لەبەرد دراوە و هەوڵەکانی لەم بوارەدا بێ ئاکام بوون و لەگەڵ شکست بەرەوڕوو بوونەتەوە. ئەم شادی و خۆشەویستییە بۆ ژیان، هەمان ئەو هێزەیە کە دەسەڵات تووشی ترس و سەرلێشێواوی دەکات.
