له ڕۆژانی ڕابردوودا، هاووڵاتیه‌كی خه‌ڵكی گوندی هه‌ركیانی سه‌ر به ناوچه‌ی شه‌پیرانی سه‌ڵماس و دانیشتووی شاری ورمێ، به ناوی “فه‌رهاد ئیبراهیمی” ته‌مه‌ن ٦٧ ساڵ، به ته‌قه‌ی به‌كرێگیراوانی سپای پاسداران گیانی له‌ده‌ست دا و برازاكه‌ی به ناوی “شایان ئیبراهیمی” ته‌مه‌ن ٢٤ ساڵ، بریندار بوو.
به‌پێی زانیارییه‌كان، دوو به‌كرێگیراوی سپای پاسداران به ناوه‌كانی “تووره‌ج و داروین موجه‌سه‌م” ڕۆژی هه‌ینی ٢٩ی پووشپه‌ڕ، به ده‌مانچه ته‌قه‌یان له‌و دوو شارومه‌نده كردووه و “فه‌رهاد ئیبراهیمی”یان كوشتووه و “شایان ئیبراهیمی” بریندار و ڕه‌وانه‌ی نه‌خۆشخانه كراوه. به وته‌ی سه‌رچاوه‌كانی هه‌واڵ، بنه‌كه‌ی هێزه ئینتزامییه‌كان له گوندی هه‌ركیان هاوكارییان له‌گه‌ڵ ئه‌و دوو ئه‌ندامه‌ی سپای پاسداران دا كردووه و سه‌ره‌ڕای تۆماركردنی سكاڵا له‌لایه‌ن بنه‌ماڵه‌ی ئیبراهیمیه‌وه، هێزه‌كانی حكوومه‌ت ڕەتیان كردووته‌وه كه بەدواداچوون بۆ دۆسیەکە بکەن.
