ڕۆژی یه‌كشه‌ممه ٢٥ی سه‌رماوه‌ز، مه‌راسیمی ئه‌سپه‌رده‌كردنی ته‌رمی سۆهه‌یب ئه‌حمه‌دی كاسبكاری قوربانی توندووتیژی بێ سنووری مه‌ئموورانی ڕژیم له شارستانی جوانڕۆ به به‌شداری به‌رینی خه‌ڵك به‌ڕێوه چوو.
به‌یانی یه‌كشه‌ممه مه‌ئموورانی ڕژیم له شاری جوانڕۆ به بێ ئاگاداركردنه‌وه‌ی پێشوه‌خت ئۆتۆمبێلی سۆهه‌یب ئه‌حمه‌دی، ته‌مه‌ن ٢٠ ساڵیان دایه به‌ر ده‌ستڕێژی گوله و له ئه‌نجامی ئه‌و ته‌قه كردنه‌دا، ناوبراو گیانی به‌خت كرد. پاش ئه‌و ڕووداوه كه‌ش و هه‌وای ئه‌منیه‌تی به‌سه‌ر شاری جوانڕۆ زاڵ كرا و خه‌ڵكی ئه‌و شاره به لێشاو به‌شداری مه‌راسمی ئه‌سپه‌رده‌كردنی ته‌رمی ئه‌و كاسبكاره گه‌نجه له گوندی عه‌لی ئاوای ساسڵ بوون. به پێی زانیارییه‌كان، چالاكانی شاری جوانڕۆ له ڕاگه‌یاندنێك دا داوایان له خه‌ڵكی ئه‌و شاره كردووه دژ به هه‌ڵسووكه‌وتی وه‌حشیانه‌ی سه‌ركوتگه‌رانی كۆماری ئیسلامی ناڕه‌زایه‌تی ده‌رببڕن.
