دەزگای دادوەریی کۆماری ئیسلامی ئێران، لە درێژەی سەپاندنی سزای قورس بەسەر دەستبەسەرکراوانی مانگی بەفرانباردا، سزای سێدارەی بەسەر چوار هاووڵاتیی بە ناوەکانی محەممەدڕەزا مەجیدی ئەسڵ، بیتا هیممەتی، بێهرووز زەمانی نەژاد و کورۆش زەمانی نژاد سەپاند و دەستی بە سەر ماڵ و مڵکی ئەو کەسانەدا گرت.
بەپێی ڕاپۆرتی گەیشتوو، لەم دواییانەدا لقی ٢٦ی دادگای شۆڕشی تاران بە سەرۆکایەتی دادوەر “ئیمان ئەفشاری“، سزای قورسی بەسەر چوار هاووڵاتیدا سەپاندووە و پێیان ڕاگەیەندراوە. بەپێی ئەم بڕیارە، محەممەدڕەزا مەجیدی ئەسڵ، بیتا هیممەتی، بێهرووز زەمانی نژاد و کورۆش زەمانی نژاد بە تۆمەتی “هاوکاری لەگەڵ گرووپە نەیارەکان” سزای سێدارەیان بەسەردا سەپێندراوە. ئەم چوار هاووڵاتییە جگە لە سزای سێدارە، بە تۆمەتی “کۆبوونەوە و تەبانی لەدژی وڵات” هەر کامەیان سزای ٥ ساڵ بەندکران و وەک سزای تەواوکاریش، سزای دەستبەسەرداگرتنی گشت ماڵ و داراییەکانیان بەسەردا سەپێندراوە. جێگای ئاماژەیە کە لە هەمان دۆسیەدا، ئەمیر هیممەتی لەلایەن دادگای شۆڕشی تارانەوە بە تۆمەتی “کۆبوونەوە و تەبانی” سزای ٥ ساڵ بەندکردن و بە تۆمەتی “چالاکی پڕوپاگەندەیی دژی نیزام” سزای ٨ مانگ زیندانی بەسەردا سەپێندراوە. شایانی باسه، دادگای شۆڕش وەک پاساو بۆ ئەم تۆمەتانە، ئاماژەی بە “بەشداری لە کۆبوونەوەکانی ١٨ و ١٩ی بەفرانبار“، “دانی دروشم“، “تێکدانی مۆڵکی گشتی” و هەندێک ئیدیعای نەسەلمێندراوی وەک “هاویشتنی کەرەستەی ئاگرین و بەکارهێنانی چەکی نادیار” کردووە.
