ڕۆیتێرز لە زمان سەرچاوە ئەمنییە دەریاییەکانەوە بڵاوی کردەوە کە ڕۆژی شەممە ٢٩ی خاکەلێوە، لانیکەم دوو کەشتیی بازرگانی لە کاتی تێپەڕبوون لە گەرووی هۆرمۆز لەلایەن ڕێژیمی ئێرانەوە کراونەتە ئامانج.
ھەروەھا کۆمپانیای “تانکەر تراکرز” ڕایگەیاند: هێزەکانی سپای پاسدارانی ئێران تەقەیان لە دوو کەشتیی هێندی کردووە. یەکێک لەو کەشتییانە نەوت هەڵگرێکی زەبەلاح بووە و بڕی دوو ملیۆن بەرمیل نەوتی خاوی عێراقی هەڵگرتووە. بەهۆی ئەو ڕووداوە و مەترسی لەسەر ژیانی تیمی سەر کەشتییەکان، هەردوو کەشتییەکە ناچار بوون ئاراستەی خۆیان بگۆڕن و گەرووەکە بەجێبهێڵن.