ڕۆژی ڕابردوو، دەزگای قەزایی کۆماری ئیسلامی حوکمی سێدارەی چەند بەندکراوی سیاسی لە زیندانەکانی ئەهواز و ئیسفەهانی پەسەند کردووە و نیگەرانییەکان سەبارەت بە جێبەجێکردنی ئەم حوکمانە بەرزتر بووەتەوە.
بەپێی زانیارییە بڵاوکراوەکان، دیوانی باڵای وڵات حوکمی سێدارەی “مەسعود جامعی“، “عەلیڕەزا مێرداسی” و “فەرشاد ئیعتمادی فەر“ی پەسەند کردووە و هەروەها “حەسەن مەسڵاوی” و “ڕەزا عەبدوڵڵایی“ش لە دۆسیەیەکی جیاوازدا حوکمی سێدارەیان بەسەردا سەپێندراوە. لە هەمان کاتدا، بەپێی ڕاپۆرتەکان، دوو برا بە ناوەکانی “هادی نیکبەخت” و “فەیزڵوڵڵا نیکبەخت” لە زیندانی دەستگەردی ئیسفەهان ڕووبەڕووی حوکمی سێدارە بوونەتەوە و برای سێیەمیان “محەممەد نیکبەخت” هێشتا لە دۆخێکی ناڕووندایە. جێگای ئاماژەیە کە چالاکان و ڕێکخراوەکانی مافی مرۆڤ، سەبارەت بە مەترسی لەسێدارەدان و هەروەها بەرزبوونەوەی ڕێژەی گوشارەکانی ناوەندە ئەمنیەکانی ڕژیمی کۆماری ئیسلامی بۆ سەر چالاکوانان و بەندکراوانی سیاسی هوشداری جددیان داوە و داوایان لە کۆمەڵگای نێودەوڵەتی کردووە کە هوڵوێستێکی بە کردەوەیان هەبێت.
