لە ڕۆژانی ڕابردوو و لە درێژەی سەپاندنی حوکمی قورسی قەزایی بە سەر هاووڵاتیانی ناڕازی لە ئێران، سێ دەستبەسەرکراوی ڕەوتی ناڕەزایەتییەکانی مانگی بەفرانبار، حوکمی سێدارەیان بەسەردا سەپێندرا.
ڕاپۆرتەکان ئاماژە بەوە دەکەن کە دوو بەندکراوی ڕاگیراو لە زیندانی عادڵ ئابادی شیراز بە ناوەکانی “موجتەبا دێهبەندی و کیانووش حەمزەیی” دوو گەنجی دەستبەسەرکراوی ڕەوتی ناڕەزایەتییەکانی بەفرانباری ساڵی ڕابردوو، بە تۆمەتی “موحاربە” حوکمی سێدارەیان بە سەردا سەپێندراوە. هەروەها هاووڵاتییەکی دیکەی خەڵکی شارستانی پکدەشت بە ناوی “ئەحەد شکوهیان” و لە دەستبەسەرکراوانی ئەو شارە، لە لایەن دادگا ئینقلابی تارانەوە بە سەرۆکایەتی قازی ئیمان ئەفشاری، بە تۆمەتی “هەوڵدان بۆ تێکدانی ئەمنیەتی وڵات، شکاندن و سووتاندنی ئیمکاناتی گشتی و هەروەها بەشداری لە کوشتنی بە ئەنقەستی دوو ئەندامی هێزەکانی ڕژیم“، حوکمی سێ جار ئیعدامی بەسەردا سەپێندراوە.
