ژمارەیەک لە کرێکارانی کۆمپانیای «هۆمان گەوهەر ئایەندە» لە شارۆچکەی پیشەسازیی شارستانی کەنارەک لە پارێزگای سیستان و بەلووچستان، دژ بە خراپیی بارودۆخی کار، درێژایی کاتژمێرەکانی کارکردن، نەدانی حەقدەستی زیادەکاری و دواکەوتنی بەردەوامی مووچەکانیان، ناڕەزایەتییان دەربڕی.
بە وتەی کرێکاران، نزیکەی ٣٠٠ کەس لەم کۆمپانیایەدا کار دەکەن و ڕۆژانە لە کاتژمێر ٧ی بەیانی تا ٩ی شەو (نزیکەی ١٤ کاتژمێر) دەوام دەکەن. مووچەی مانگانەی ئەوان نزیکەی ٢٠ تا ٢٢ ملیۆن تمەنە و دەڵێن ئەم بڕە تەنیا لەسەر بنەمای مووچەی بنەڕەتی هەژمار دەکرێت و سەرەڕای کارکردنی درێژخایەن، هیچ پارەیەکیان وەک زیادەکاری پێ نادرێت. کرێکاران جەختیان لەوە کردووەتەوە کە بەپێی یاسای کار، کاتی ئاساییی کارکردن لە هەفتەدا ٤٤ کاتژمێرە و کاری زیادەش شایستەی پاداشتی تایبەتە، بەڵام کاتی کارکردنی ڕۆژانەیان لەم کۆمپانیایەدا زۆر لە ئاستی یاسایی زیاترە.