به پێی ڕاپۆرته‌كان، “فه‌ردین مه‌ولوودی” به‌ندكراوی سیاسی پێشووی خه‌ڵكی شاری سنه، له لایه‌ن دادگای ئینقلابی ڕژیمه‌وه حوكمی پێنج ساڵ زیندانی ته‌عزیری به‌سه‌ردا سه‌پێندرا.
ناوبراو ڕۆژی شه‌ممه ٧ی پووشپه‌ڕی ئه‌مساڵ و هاوكات له‌گه‌ڵ شه‌ڕی ١٢ ڕۆژه‌ی نێوان ڕژیمی كۆماری ئیسلامی و ده‌وڵه‌تی ئیسرائیل، له لایه‌ن هێزه‌كانی ئیداره‌ی ئێتڵاعاتی ڕژیمه‌وه ده‌ستبه‌سه‌ر و ڕه‌وانه‌ی گرتووخانه‌كانی ئه‌و ناوه‌نده كرا. ئه‌و هاووڵاتییه پاش كۆتایی هاتنی ڕه‌وه‌ندی لێپرسینه‌وه، بۆ زیندانی ناوه‌ندی شاری سنه ڕاگوێزراوه و له پێنج مانگی ڕابردوودا، له مافی ده‌ستڕاگه‌یشتن به پارێزه‌ر و په‌یوه‌ندی له‌گه‌ڵ بنه‌ماڵه‌كه‌ی بێبه‌ش كراوه.