نزیکەی ٣٠ کرێکاری کارگەی فۆڵادسازی ئەمیر ئاروان لە شاری قوم، دژ بە پێنەدانی سێ مانگ حەقدەست و بیمە، بۆ ماوەی نزیکەی یەک هەفتەیە دەستیان لە کار کێشاوەتەوە.
ئەم کرێکارانە لە بەشەکانی بڕینی پارچە، کونکردن و بڕینی پەڕەی ئاسن بە ئامێری گیۆتین کار دەکەن. بە وتەی ناڕازیان، لە مانگی پووشپەڕەوە تا ئێستا حەقدەستەکانیان پێ نەدراوە و پارەی بیمەی ئەو مانگەش بۆ دامەزراوەی تەئمینی ئیجتماعی نەگەیەنراوە و ئەم دواکەوتنە وای کردووە هەندێک کرێکاری دەرکراو لە کارگەکە نەتوانن سوود لە بیمەی بێکاری وەربگرن. کرێکاران دەڵێن، بەدواداچوونی دووبارەیان بۆ وەرگرتنی حەقدەستە دواخراوەکانیان و ناردنی لیستی بیمە تا ئێستا بێ ئەنجام بووە و بەرپرسان تەنها بەڵێنی پێدانی پارەیان لە ڕۆژانی داهاتوودا داوە.