به‌پێی هه‌واڵی گه‌یشتوو، ناوه‌نده ئه‌منیه‌تیه‌كان، پاش له‌سێداره‌دانی ڕه‌ه‌زا ڕه‌سایی، ته‌رمی ئه‌و گیانبه‌ختكردووه‌یان له گۆڕستانی میناوای كرماشان و دوور له شاری سه‌حنه به خاك سپاردووه.
به وته‌ی هاووڵاتیان، ته‌نیا دایك، خۆشك و برای ڕه‌زا ڕه‌سایی له كاتی ناشتنی ته‌رمی ئه‌و گیانبه‌ختكردووه حزووریان بووه و هه‌ڕه‌شه‌یان لێ كراوه كه نابێت مه‌راسمی پرسه و سه‌ره‌خۆشی بۆ كوڕه‌كه‌تان له شاری سه‌حنه به‌ڕێوه ببه‌ن. ڕه‌زا ڕه‌سایی له ڕه‌وتی ناڕه‌زایه‌تیه‌كانی شۆڕشی ژینا له شاری كرماشان به تۆمه‌تی هاوكاری له كوشتنی نادر به‌یرامی، فه‌رمانده‌ی ئیتلاعاتی سپای پاسداران ده‌ستبه‌سه‌ر و له ژێر ئه‌شكه‌نجه دا ناچار به دانپێدانانی زۆره‌ملێ دژبه خۆی كرا. ئه‌و به‌ندكراوه سیاسییه پاش ماوه‌یه‌ك مانه‌وه له زیندان، له‌لایه‌ن دادگای ئینقلابی كرماشانه‌وه به ئێعدام مه‌حكووم كرا.