ڕاپۆرتە نوێیەکانی ناو بەندیخانەی دەستگردی ئیسفەهان، پەردە لەسەر بەڕێوەچوونی شێوازی جیاوازی ئەشکەنجە و توندوتیژیی ڕێکخراو دژ بە بەندکراوان و بەتایبەت بەندکراوانی سیاسی و ئەمنی لادەدەن.
ڕاپۆرتەکان ئاماژە بەوە دەکەن کە بەرپرسان و هێزەکانی پاراستنی زیندانەکە لە بەندە تاکەکەسییەکاندا، بە بچووکترین بیانوو بەندکراوان بە باتۆم بە توندی بریندار دەکەن و دەست و قاچیان بە ستوونەکانی نێو ڕێڕەوەکانەوە دەبەستن. بەپێی زانیارییەکان، لە چەندین حاڵەتدا توندیی ئەم لێدان و ئەشکەنجانە بووەتە هۆی شکانی ئێسک، خوێنڕێژیی و تەنانەت گیانلەدەستدانی بەندکراوان لە ژێر ئەشکەجەدا، کە دواتر بەرپرسانی زیندان بە ڕێکخستنێکی ساختە هۆکاری مردنەکەیان وەک تێکهەڵچوونەکانی نێوان بەندکراوەکان تۆمار کردووە.