لە ڕۆژانی ڕابردوو و هاوکات لەگەڵ درێژەی هێرشە ئاسمانییەکان بۆ سەر ناوچە جیاوازەکانی ئێران، ژێرخانە مەدەنی و خزمەتگوزارییە گشتییەکانیش بوونەتە ئامانج و زیانێکی فراوانیان پێگەیشتووە کە کاریگەریی ڕاستەوخۆی لەسەر ژیانی ڕۆژانەی هاووڵاتیان هەیە.
بەپێی زانیارییە بڵاوکراوەکان، هەزاران بینای نیشتەجێبوونی هاووڵاتیانی مەدەنی لە شار و ناوچە جیاوازەکاندا زیانیان پێگەیشتووە، هەروەها ژمارەیەکی بەرچاو لە ناوەندە تەندروستییەکان، قوتابخانەکان و دامەزراوە خزمەتگوزارییەکانیش لەم هێرشانەدا تووشی زیان بوون. بەپێی ڕاپۆرتی گەیشتوو ئەم زیانانە تەنها لە چوارچێوەی زیانی ماددیدا نەماونەتەوە، بەڵکوو بە شێوەیەکی ڕاستەوخۆ کاریگەرییان لەسەر سیستەمی تەندروستی، پەروەردە و خزمەتگوزارییە بنەڕەتییەکان داناوە، کە دەتوانێت بێتە هۆی قووڵبوونەوەی قەیرانی مرۆیی لە ناوچەکاندا. لە هەمان کاتدا، ڕاپۆرتەکان باس لە زیانگەیاندن بە ئامرازەکانی ڕزگارکردن و گواستنەوەی برینداران دەکەن، کە ئەمەش توانای وەڵامدانەوەی خێرای دامەزراوەکانی فریاکەوتن کەم دەکاتەوە و دۆخی مرۆیی ئاڵۆزتر دەکات.