شه‌وی دووشه‌ممه ١٧ی گوڵان، شارومه‌ندانی ئیسڕائیلی له چه‌ند شاری ئه‌و وڵاته هاوكات له‌گه‌ڵ بڕیاری ده‌وڵه‌ت بۆ هێرشكردنه سه‌ر ڕه‌فه‌ح ڕژانه سه‌ر شه‌قام و خۆپێشاندانیان كرد.
شه‌وی ڕابردوو گرووپی حه‌ماس هاوكات له‌گه‌ڵ بۆدوومانی چه‌ند ناوچه له شاری ڕه‌فه‌ح پێشنیاری ئاگربه‌ست كه له‌لایه‌ن میسر و قه‌ته‌ره‌وه ئاماده‌كرابوو، په‌سه‌ند كرد و یه‌ك لایه‌نه به ده‌وڵه‌تی ئیسڕائیلی ڕاگه‌یاند كه ئاماده‌ی ئاگربه‌ستی چه‌ند حه‌فته‌ییه. له به‌رانبه‌ردا به‌رپرسانی ده‌وڵه‌تی ئیسڕائیل ڕه‌دیان كردووه و هێزه‌كانی چوونه نێو شاری ڕه‌فه‌ح و دوو ناوچه‌یان داگیر كرد. هاوكات شارومه‌ندانی ئیسڕائیلی كه نیگه‌رانی ته‌ندرووستی دیله‌كانی ده‌ستی حه‌ماس بوون، دژبه ده‌وڵه‌تی نتانیاهوو ڕژانه سه‌ر شه‌قام و داوایان كرد ئاگربه‌ست په‌سه‌ند بكرێت تاكوو دیله‌كانی ده‌ستی حه‌ماس بگه‌ڕێنه‌وه ئامێزی بنه‌ماڵه‌كانیان.
