بەپێی دوایین هەواڵەکان، هێرشە هەواییە هاوبەشەکانی ئامریکا و ئیسرائیل بۆ سەر پێگە سەربازی و ئەمنییەکانی کۆماری ئیسلامی لە شارە جیاوازەکانی ئێران هێشتا بەردەوامن.
بە وتەی سەرچاوەکانی هەواڵ، لە درێژەی ئەم هێرشانەدا ژمارەیەک لە شارەکان لەوانە تاران، کەرەج، کرمان، بەندەرعباس، شیراز و هەندێک ناوچەی دیکە بەر هێرش و تەقینەوە کەوتوون. ڕاپۆرتەکان باس لە بیستنی دەنگی تەقینەوەی توند لە ناوچە جیاوازەکانی تاران و کەرەج دەکەن و شایەتحاڵەکان دەڵێن لە هەندێک ناوچە دووکەڵی ڕەش لە ئاسمان بەرز بووەتەوە. هەروەها لە شاری کرمان چەند تەقینەوەیەکی جیاواز لە ناوچەکانی دەوروبەری فڕۆکەخانە و هەندێک ناوەندی سەربازی تۆمار کراوە. لە هەواڵێکی دیکەدا هاتووە کە بنکەی هەوایی بەندەرعباسیش بەر هێرش کەوتووە و شایەتحاڵەکان باس لە بەرزبوونەوەی زیانەکانی ڕژیم دەکەن. هەروەها ڕاپۆرتەکان ئاماژە بەوە دەکەن کە لە هەندێک ناوچەی تاران، لەوانە دەوروبەری فڕۆکەخانەی مێهرئاباد و ناوچەکانی ڕۆژهەڵاتی شار، دەنگی تەقینەوەی توند بیستراوە، بەڵام تا کاتی داڕشتنی ئەم هەواڵە، زانیارییەکی ورد سەبارەت بە ئاستی زیانەکان یان ژمارەی قوربانییەکان بڵاونەکراوەتەوە.