ڕۆژی دووشه‌ممه ٢٧ی ڕه‌شه‌مه‌ی ١٤٠٣، كۆمه‌ڵێك له ئازادیخوازانی فه‌ڕانسه له‌به‌رده‌م دادگای مافی مرۆڤی ئورووپا له شاری ستراسبوورگ كۆبوونه‌وه و ناڕه‌زایه‌تی خۆیان له ئاست كۆمه‌ڵكوژی عه‌له‌وییه‌كان له‌لایه‌ن حكوومه‌تی نوێی سووریه نیشان دا.
له‌و كۆبوونه‌وه‌دا، یه‌كێتی عه‌له‌وییه‌كانی فه‌ڕانسه، نوێنه‌رانی حیزبی به‌رابه‌ری و دیمۆكراسی گه‌لان، ناوه‌ندی كۆمه‌ڵگه‌ی دیمۆكراتیكی ستراسبوورگ، ڕێكخراوه مه‌ده‌نییه‌كان، ژماره‌یه‌ك له لایه‌نگرانی گرووپه شۆڕشگێڕه‌كانی فه‌ڕانسه و نوێنه‌رانی پاڕله‌مان به‌شدار بوون و دژایه‌تی خۆیان له‌گه‌ڵ سه‌ركوتی سیستماتیكی كورده‌كان، عه‌له‌وه‌ییه‌كان، درۆزه‌كان و مه‌سێحییه‌كان نیشان داوه. خۆپێشانده‌ران به وتنه‌وه‌ی دروشم كۆبوونه‌وه‌ی به‌رپرسانی چه‌ند ده‌وڵه‌تی ئورووپایی له‌گه‌ڵ ئه‌حمه‌د شه‌رع و ناساندی تیرۆریستانی ئه‌لقاعیده‌یان وه‌كوو هێزی ئه‌منیه‌تی حكوومه‌تی سووریا به توندی مه‌حكووم كرد.
