ڕۆژی هه‌ینی ٤ی جۆزه‌ردان، مه‌راسمی یه‌كه‌مین ساڵڕۆژی قه‌تڵی حكوومه‌تی “بامشاد سوله‌یمانی” خوێندكاری خه‌ڵكی ئیلام به به‌شداری به‌رینی خه‌ڵك به‌ڕێوه چوو و باوكی ئه‌و گیانبه‌ختكردووه جه‌نایه‌ته‌كانی كۆماری ئیسلامی ئاشكرا كرد.
“بامشاد سوله‌یمانی” خوێندكاری ته‌مه‌ن ١٩ ساڵی خه‌ڵكی شارستانی ئاودانانی سه‌ر به پارێزگای ئیلام له ساڵگه‌ردی شۆڕشی ژینا ده‌ستبه‌سه‌ر و به سه‌ختی ئه‌شكه‌نجه و ئازار درا. كاتێك به برینداری ده‌گه‌ڕێته‌وه بۆ ماڵ به‌هۆی ئێش و ئازاری زۆره‌وه دوو حه‌بی ناپڕۆكسن ده‌خواد و ده‌چێته كۆما. به‌دوای گواستنه‌وه‌ی بۆ نه‌خۆشخانه، پزیشكان ده‌ڵێن كه چه‌ند ئه‌ندامی ده‌روونی ئه‌و لاوه به‌هۆی ژه‌هرخواردكردن له‌كار كه‌وتووه و چه‌ند ده‌نده‌ی په‌راسووی شكاوه. بامشاد ڕۆژی ٧ی جۆزه‌ردانی ١٤٠٢ گیانی له‌ده‌ست ده‌دات و بنه‌ماڵه‌كه‌ی له‌لایه‌ن ئیتلاعاته‌وه بانگهێشت و هه‌ڕه‌شه‌یان لێ ده‌كرێت. ڕۆژی ١١ی جۆزه‌ردان خه‌ڵكی ئاودانان دژ به‌و جه‌نایه‌ته ده‌ڕژێنه سه‌ر شه‌قام و خۆپێشاندان ده‌كه‌ن، به‌ڵام چه‌ند كه‌سیان به ته‌قه‌ی هێزه‌كانی ڕژیم بریندار و چه‌ندین كه‌سی دیكه‌ش ده‌ستبه‌سه‌ر ده‌كرێن. له یه‌كه‌مین ساڵڕۆژی قه‌تڵی حكوومه‌تی بامشاد باوكی به نیشاندانی به‌ڵگه‌ی دادگا و پزیشكی داد هۆكاری مردنی كوڕه‌كه‌ی بۆ خه‌ڵك باس ئه‌كات و جه‌نایه‌ته‌كانی ڕژیم ئاشكرا ده‌كات. باوكی بامشاد له مه‌راسمی ساڵڕۆژی ڕۆڵه‌كه‌ی دا ڕایگه‌یاند: هیچم بۆ له‌ده‌ستدان نییه، كوڕه‌كه‌میان كوشتووه و قه‌د له‌بیری ناكه‌م و جه‌نایه‌تكاران نابه‌خشم.