12
شەوی چوارشەممە ١٠ی پووشپەڕ، کۆماری ئیسلامی بە بەکارهێنانی دڕۆنی ئینتحاری و مووشەک، چەندین بنکە و بارەگای حیزبە کوردستانییەکانی لە ناوچە سنوورییەکان و هەرێمی کوردستان کردە ئامانج.
لەم هێرشانەدا بنکەی دێگەڵەی حیزبی دێموکرات و ناوچە جیاوازەکانی دیکە کراونەتە ئامانجی پەلامارەکان. بەپێی ڕاپۆرتە گەیشتووەکان، لەو هێرشە دڕۆنییانەدا کەمپی دێگەڵە کە شوێنی نیشتەجێبوونی ژمارەیەک لە بنەماڵەکانی حیزبی دێموکراتە، بە توندی کرایە ئامانج و زیانی ماددی زۆری بەرکەوتووە. هاوکات لە ئاسمانی شاری هەولێریش مووشەکێکی بالیستیکی ئاراستەکراو لە لایەن سیستەمی بەرگرییەوە تێکشکێندراوە کە پێدەچێت ئامانجەکەی بنکەیەکی دیکەی حیزبی بووبێت.
