کۆمپانیای دەوڵەتیی وزەی ئەتۆمیی ڕووسیا ناسراو بە “ڕووس ئەتۆم” ڕایگەیاند کە بە هۆی هێرشە نوێیەکانەوە بۆ سەر ئێران، پرۆسەی گەڕانەوەی یەکەمین گرووپی کارمەندان و کرێکارانی خۆی بۆ وێستگەی ئەتۆمیی بووشێهر ڕاگرتووە.
بەپێی ڕاپۆرتەکان، پاش ئەوەی میدیاکانی ڕژیم ڕایانگەیاند کە مووشەکێکی ئەمریکایی بەر ناوچەکانی دەوروبەری ئەم وێستگەیە و بنکەیەکی سەربازی لە دەوروبەری بووشێهر کەوتووە، ڕووسیا ئەم بڕیارەی داوە. کۆمپانیای ڕووس ئەتۆم کە سەرقاڵی دروستکردنی دوو یەکەی نوێیە لە وێستگەی بووشێهر، پێشتر و لەگەڵ دەستپێکردنی شەڕی ئەمریکا و ئیسرائیل دژی کۆماری ئیسلامی، زیاتر لە ٦٠٠ کارمەندی خۆی لە ئێران کشاندبووەوە و گواستبوونیەوە بۆ ڕووسیا. هەرچەندە لەم ڕۆژانەدا ژمارەیەک لەم کارمەندانە بۆ دەستپێکردنەوەی کارەکانیان گەیشتبوونە تاران، بەڵام بە هۆی گرژییە نوێیەکانەوە درێژەی گەشتەکەیان بۆ بووشێهر ڕاگیراوە و چارەنووسی پڕۆژەکە بە نادیاری ماوەتەوە.
