بە گوێرەی هەواڵێک کە لە ئەفغانستانەوە بە دەستمان گەیشتووە، ڕۆژی پێنجشەممە ٧ی مارس کۆمەڵێک لە ژنان و پیاوانی پەنابەری چەپ و ئازادیخواز لە یەکێک لە شارەکانی ئەفغانستان، ٨ی مارس ڕۆژی جیهانی ژنیان بەرز ڕاگرت.
بەپێی ئەو هەواڵە ژمارەیەکی بەرچاو لە ژنان و پیاوانی پەنابەری چەپ و ئازادیخواز لە ئەفغانستان بە بۆنەی ٨ی مارس ڕۆژی جیهانی ژن، ڕێوڕەسمێکیان بەڕێوە بردووه. ڕێوڕەسمەکە سەرەتا بە خوێندەوەی سروودی ئەنترناسیۆناڵ سروودی هاوپشتی جیهانی چینی کرێکار دەستی پێکردووه و پاشان دەقیقەیەک بێدەنگی بۆ رێزگرتن لە یادی سەرجەم گیانبەختکردووانی ڕێگای ئازادی و بەرابەری ڕاگەیاندراوه. دواتر لەلایەن یەکێک لە بەشداربووانەوە قسە و باسێک سەبارەت بە مێژووی ٨ی مارس و بارودۆخی ژنان لە ئاستی جیهان و بە تایبەت لە ئێران و ئەفغانستانی ژێر دەسەڵاتی کۆنەپەرست و جینایەتکاری تاڵیبان و کۆماری ئیسلامی پێشکەش کراوه و ڕێز لە خەبات و فیداکاری ژنانی بوێری ئەفغانستان و پێشەنگانی شۆڕشی “ژن،ژیان،ئازادی” لە ئێران گیراوه. شایانی باسه كه ڕێوڕەسمەکە بە بڵاوکردنەوەی گوڵ و شیرینی و وتنەوەی دروشمی شۆڕشگێڕانە کۆتایی پێهاتووه.
