ڕۆژی هه‌ینی ٢٤ی خاكه‌لێوه، دوو ده‌وڵه‌تی فاشیستی كۆماری ئیسلامی و ئیسڕائیل هه‌ڕه‌شه‌كا‌نیان دووپات كرده‌وه و وڵاتانی ئورووپاییش سه‌باره‌ت به هه‌ڵگیرسانی شه‌ڕێكی ناوچه‌یی هۆشداریان به كۆماری ئیسلامی دا.
شه‌وی هه‌ینی به ده‌یان مووشه‌ك و په‌هباد له خاكی لوبنان و كه‌رتی غه‌زه ئاراسته‌ی شاره‌كانی ئیسڕائیل كرا، به‌ڵام هیچ زیانێكی لێ نه‌كه‌وته‌وه و له ئاسمانه‌وه ته‌قێندرانه‌وه. هه‌ندێك له سه‌رچاوه‌كانی هه‌واڵ باسیان له هێرشی گه‌وره‌ی كۆماری ئیسلامی و میلیشیاكانی سه‌ر به‌و وڵاته له ٤٨ كاتژمێری داهاتوو كرد و شیركه‌ت فڕۆكه‌وانییه‌كانی ئاڵمان و ئۆتریش، گه‌شته ئاسمانیه‌كانیان بۆ ئێران ڕاگرت و زۆرێك له وڵاتانی جیهان به شارومه‌ند و دیپلۆماتكاره‌كانیان ڕاگه‌یاند: به زووترین كات ناوچه‌كه به‌جێ بێڵن و به هیچ شێوه‌یه‌ك سه‌ردانی ئێران، فه‌له‌ستین و ئیسڕائیل نه‌كه‌ن.
